Kryeministri Edi Rama theksoi pozicionimin e Shqipërisë në raport me luftën në Ukrainë dhe marrëdhëniet me Rusinë, duke nënvizuar se qëndrimi i Tiranës ka qenë dhe mbetet në anën e vendeve demokratike.
“Më duhet t’ju informoj se jeni në një vend i cili, që nga ndryshimi i regjimit 35 vjet më parë, nuk ka pasur asnjë vizitë të një presidenti apo kryeministri rus dhe as nga Shqipëria nuk ka pasur vizita drejt Moskës.
Nuk na merr malli, dhe as po kërkojmë ta ndryshojmë këtë,” deklaroi Rama në një konferencë të përbashkët me homologun britanik Keir Starmer
Rama u shpreh se Shqipëria, si pjesë e NATO-s dhe e projektit evropian, është e angazhuar në mbrojtjen e lirive, vlerave dhe paqes, ndërsa nuk do të heqë kurrë dorë nga përpjekja për të ruajtur këto parime.
“Është ndonjëherë e padrejtë, por kjo është natyra e të qenit evropian dhe pjesë e njerëzimit – që të kërkojmë paqe, edhe me barbarët,” përfundoi Rama.
Pjesë nga fjala e Ramës:
Më duhet t’ju informoj që jeni në një vend i cili që nga ndryshimi i regjimit nga diktaturë në demokraci 35 vjet më parë, asnjë president a kryeministër rus nuk ka vënë këmbë këtu dhe asnjë prej këtej nuk ka fluturuar në Rusi. Nuk na merr malli as po kërkojmë ta ndryshojmë. Kjo është një histori e gjatë që lidhet me ish historikun tonë me BS dhe Rusinë. Kemi qenë në krye të herës në krah të Ukrainës dhe do të vazhdojmë.
Jemi të vetëdijshëm se edhe pse ky vend ka kryeministrin më të gjatë në NATO nuk ka fuqinë e shumë vendeve të tjera për të luajtur ndonjë roli madhor apo përcaktues. Por nuk duhet të harrojmë se jemi të bekuar që kemi lindur në kontinentin e iluminizmit dhe në një hapësirë të njerëzimit ku lindi ëndrra e paqes së përhershme dhe vetë Europa është një projekt që ka qenë gjithnjë i orientuar drejt paqes. Ndërkohë që nm do të bëjmë gjithçka që të sigurohemi të kemi fuqinë për të mbrojtur lirinë tonë, vlerat tona. Po kështu nuk do të heqim kurrë dorë nga kërkimi i paqes.
Sigurisht ndonjëherë duket shumë e padrejtë por është natyra e të qenit europian dhe e të qenit nga ana e njerëzimit dhe jo e barbarëve, që të kërkojmë paqe edhe me barbarët.
