Kryetari i Lidhjes Demokratike të Kosovës, Lumir Abdixhiku, ka reaguar për mbledhjen e Komunitetit Politik Europian në Tiranë gjatë ditës së sotme.
Përmes një postimi në rrjetet sociale, Abdixhiku shkruan se Tirana sot shihet si epiqendër e re rajonale, ku sipas tij, po gdhendet e ardhmja e vetë kontinentit.
Ndërkohë, shkruan Abdixhiku Kosova vijon të mbetet nën masa dhe sanksione nga BE, si dhe pa institucione, për shkak se qëllimi i qeverisë Kurti është shijimi i pushtetit.
Ai përgëzon Shqipërinë për Samitin, teksa i bën thirrje popullit të Kosovës për rizgjim.
Postimi i Abdixhikut:
Evropa sot po zbarkon në Tiranë.
E gjitha. Me plot 47 liderët e saj.
Në Tiranën që tashmë, si epiqendër e re rajonale, është bërë shtëpi nga ku po gdhendet e ardhmja e vet kontinentit. Në këtë të ardhme, pa dyshim, po i bëhet vendi dhe vendit të shqipeve.
Kosova, ndërsa, vazhdon të mbetet nën masa e sanksione. Vazhdon të mbetet dhe pa institucione. Mbi të gjitha, vazhdon të mbetet pa ndjenjën e urgjencës për kohën. Nuk ka urgjencë mu tha!
Të tjerat, si zhvillimi, mirëqenia, si progresi shoqëror janë të pakapshme për ata që kanë kapur të ardhmen e vendit tash e sa kohë. Sepse për ta shijimi i jetës së pushtetit, është vet qëllimi. Të tjerat presin.
Sepse kemi rënë. Po vazhdojmë rënien. Të tjerët po vazhdojnë ecjen. Të tjerët po ndërtojnë. Të tjerët po bëhen pjesë e së ardhmes së bukur evropiane që tani u shfaqet vetëm pak vite larg.
Rizgjimi kombëtar ndonjëherë kërkon kohë.
Por sot, ky rizgjim Kosove, kërkon urgjencë.
Kjo urgjencë nuk vjen nga ata që nuk e njohin nevojën. Vjen nga populli i Kosovës që rizgjohet!
Shqipërisë, vetëm përgëzime.
