Pas mbështetjes që mori në Samit nga liderët e europës për mandatin e katërt, një mesazh i fortë vjen edhe nga SHBA. Dhëndri i presidentit Trump, Jared Kushner në një videomesazh në një prej forumeve me të rëndësishme ndërkombëtare ekonomike që u mbajt në Tiranë, e quan Edi Ramën një politikan të zotë. Ai thekson se kjo qeveri ka ndryshuar klimën e jetesës dhe e ka bërë Shqipërinë një vend të sigurt për të investuar.
Shumë e kanë pyetur përse po investon në Shqipëri. Por përgjigjen dhëndri i Presidentit Donald Trump, Jered Kushner, thotë se e sheh tek ndryshimi që qeveria Rama i ka sjellë vendit.
“Edi është një politikan shumë i zoti, i fuqishëm dhe lider i zgjuar. Qeveria në Shqipëri po bën punë që çon në investime, në zhvillim, turizëm, në rritjen e punësimit dhe pagave. Kështu që të gjitha gjërat e duhura po ndodhin”, tha Kushner.
Kjo vjen si një përgjigje e fortë ndaj kreut të PD Sali Berishës humbësit të 11 majit, që ende nuk ka pranuar rezultatin, i cili pas mesazhit të fortë mbështetës që mori kryeministri Rama nga samiti i komunitetit politik europian në Tiranë, shpresën e vetme mund ta kishte te një qëndrim i SHBA, ku mund të ndikonte përmes lobimit të mistershëm 6 milionë dollarësh.
Por mesazhi i dhëndrit të Donald Trump, i cili në mandatin e parë ishte një prej këshilltarëve kryesorë të presidentit, është i qartë.
Përmes një videomesazhi në një prej forumeve ekonomike më të rëndësishme ekonomike që u mbajt për herë të parë në Tiranë, dhe u përshëndet edhe nga presidenti francez Emanuel Macron gjatë vizitës së tij të dytë zyrtare në Tiranë, Kushner, vlerësoi një tjetër projekt të qeverisë Rama, gjithashtu të kritikuar nga opozita e Berishës, aeroportin e Vlorës.
“U tërhoqa menjëherë nga vendi ku po ndërtohej aeroporti në Vlorë. Dhe është e qartë që një vend që ndërton një aeroport buzë detit, e bën këtë në vendin që mendon se është më i bukuri”, vijoi Kushner.
Por përse zgjodhi të ndërtojë një super resort në një nga zonat më të bukura të Shqipërisë, ishullin e Sazanit.
“Gjithçka ka të bëjë me vendndodhjen – 60 milje nga Italia, 60 milje nga Korfuzi – dhe një aeroport i ri shumë afër. Kemi angazhuar një nga inxhinierët më të mirë në Europë për të ruajtur mjedisin”, tha Kushner.
Me statusin e investitorit strategjik prej janarit, dhëndri i Trump, Jered Kushner, do të ndërtojë një resort me vlerë 1.4 miliardë dollar, edhe me shtetin shqiptarë pjesë të investimit.
