Forumi Ndërkombëtar i Investimeve të Ardhshme (FII), një platformë globale që mbledh liderë politikë dhe drejtues të korporatave më të mëdha në botë për të diskutuar inovacionin, investimet dhe të ardhmen e ekonomisë botërore u mbajt në Tiranë.
Gjatë këtij eventi, kryeministri Edi Rama është ndalur tek traditat dhe vlerat që karakterizojnë shqiptarët, duke e lidhur mikpritjen me një element themelor të identitetit kombëtar.
Rama ka theksuar se profesioni i parë i shqiptarëve është mikpritja, duke e cilësuar këtë si një “fe” që i bashkon ata si komb.
“Profesioni i parë që kemi ne shqiptarët është mikpritja, është ‘feja’ që na bashkon,” tha ai, duke e lidhur këtë traditë të hershme me besimin dhe vlerat fetare që ndajnë shqiptarët, të cilat e ngrenë mikpritjen në një nivel të shenjtë.
Ai përmendi gjithashtu fjalët e Papa Francesku, i cili ka thënë se kjo mikpritje dhe vëllazëria fetare është një veçanti e shqiptarëve.
“Papa Francesku tha që kjo nuk është e zakonshme, është vëllazëri fetare. Secili ka mënyrën e tij si e sheh Zotin, por të gjithë kemi një bindje që na përbashkon dhe është e vulosur në Kanun, që shtëpia jonë i përket Zotit dhe mikut. Këtu ju trajtojmë si Perëndi”, theksoi Rama.
