Pasi familjarët, miqtë dhe kolegët bënë homazhe, përcillet për në banesën e fundit Piro Milkani, regjisori i njohur që u nda nga jeta një ditë më parë. Ai do të prehet në varrezat e Sharrës.
I biri, Eno Milkani tha për Report TV se i ati ndihej i realizuar pasi kishte provuar edhe skenarin dhe aktrimin. Eno foli edhe për ditët e fundit të jetës së tij, ndërsa tha se nuk e humbiste besimin se do të bëhej mirë.
“E ndjente veten shumë të realizuar, sepse e thoshte e provoi skenari dhe aktrimin. Gjatë kësaj periudhe kishte ulje të rezistencës të organeve jetësore, por nuk e humbiste besimin thoshte do shërohem dhe kështu do të inkurajonim njëri-tjetrin.”, tha Eno Milkani.
Poeti Skënder Sherifi, teksa bëri homazhe, tha se u shua një pioner i artit shqiptar. “Ishalla Piro vazhdon me na frymëzuar nga atje lart me atë që kemi dashur. Energjia e tij është diku me ne”, u shpreh ai.
Regjisori Kujtim Çashku, teksa bëri homazhe, tha për Report TV se ai la një trashëgimi që do të “frymojë” për breza të tërë. “Do t’i flasë brezave se në qëllimin final të tij, artisti nuk është i lidhur me jetën fizike.”, theksoi Çashku.
Piro Milkani u nda nga jeta mbrëmjen e së shtunës në moshën 86-vjeçare. ishte një prej figurave më të rëndësishme të kinematografisë shqiptare, me një karrierë të gjatë dhe kontribut të jashtëzakonshëm në artin e regjisurës. Ai do të mbahet mend si një personalitet i dashur dhe i respektuar jo vetëm për talentin, por edhe për dashurinë dhe përkushtimin ndaj artit dhe familjes.
Për kontributin e tij të jashtëzakonshëm në kinematografinë shqiptare, Milkani është nderuar me tituj dhe çmime të shumta, përfshirë titullin “Artist i Popullit” (1987) dhe medaljen “Ambasador i Filmit Shqiptar” nga Ministria e Kulturës e Shqipërisë.
