Nga e shtuna, 6 qershor 2015, deri të shtunën, 31 maj 2025. Nga Barcelona te Paris Saint-Germain. Nga Berlini në Mynih.
Një cikël që mbyllet për Luis Enrique, i cili pas fitores ndaj Interit veshi një fanellë të veçantë me një përfaqësim të vajzës së tij Xana, e ndarë nga jeta në vitin 2019 në moshën 9-vjeçare për shkak të një forme shumë agresive të kancerit të kockave.
Në vitin 2015, pas triumfit me Barcelonën, Xana kishte zbritur në fushë për të festuar me babanë e saj, me një flamur të madh blaugrana në duar.
Menjëherë pas triumfit të ri, trajneri u afrua te tifozët, të cilët kishin shpalosur një pankartë gjigande që rikrijonte atë skenë të paharrueshme. Nga tribuna iu hodh një fanellë e personalizuar, të cilën ai e veshi në fushë: një bluzë e zezë, me një vizatim të thjeshtë në gjoks — dy figura, njëra e vajzës së tij, që së bashku ngulin flamurin e PSG-së në fushën e lojës.
“Vajza ime është me mua që nga momenti kur iku. U largua fizikisht, por është gjithmonë me mua. Nuk kam nevojë për një fitore në Champions për ta kujtuar. Në jetë lindim, vdesim dhe gjithçka tjetër shihet rrugës. Dua ta kujtoj me shpirt,” tha ai.
Vizatimi simbolik
“Vajza ime nuk do të jetë fizikisht në finale, por do të jetë shpirtërisht,” kishte thënë Luis Enrique në prag të ndeshjes. “Ëndrra ime është të rikrijoj skenën e vitit 2015, kur Xana nguli flamurin e Barcelonës. Kam dëshirë ta bëj të njëjtën gjë me PSG-në.” Dhe kështu ndodhi.
