Ambasadori gjerman në Tiranë, Karl Bergner shprehet optimist se Shqipëria është në rrugë të mbarë në procesin e integrimit në BE.
“Me hapjen e 4 nga 6 grup kapitujt e negociatave, Shqipëria ka bërë përparim rekord. Ekipi negociator po bën një punë të shkëlqyer dhe jam i bindur se edhe dy grup-kapitujt e mbetur do të hapen deri në fund të vitit”, tha ai.
Megjithatë, sipas kryediplomatit gjerman ndonëse në një moment kyç, procesi integrimit në këtë fazë përballet edhe me sfida.
“Është si një ndeshje futbolli, para se të fillojë mendon për taktikat, por kur bie bilbili i parë, loja ndryshon. Kjo kërkon më shumë energji për të gjithë: ambasadën tonë, qeverinë shqiptare. Për këtë arsye ne do të vazhdojmë të përforcojmë bashkëpunimin”, u shpreh ai.
Teksa thekson mbështetjen e Gjermanisë për qeverinë shqiptare, ambasadori tregon prioritetet dhe fokusin e Shqipërisë në rrugën drejt integrimit.
“Sundimi i ligjit, qeverisja dhe lufta kundër korrupsionit, janë thelbësore, si për BE-në, ashtu edhe për qytetarët shqiptarë që na kanë shprehur këtë shqetësim. Jam optimist që Shqipëria do të arrijë shumë prej objektivave që ka vendosur për veten, dhe ne do të jemi këtu për ta mbështetur”, tha më tej Bergner.
Këtë muaj pritet që Shqipëria të hapë grup kapitullin 4 që përfshin Agjenda e Gjelbër dhe Ndërlidhjen e Qëndrueshme. Ndërsa brenda vitit qeveria synon edhe hapjen e grup kapitullit të fundit të mbetur, ai për sektorin e bujqësisë.
