Biznesmeni i njohur shqiptar nga Maqedonia e Veriut dhe Kryetari i Odës Ekonomike të Maqedonisë Veriperëndimore, z. Mendi Qyra, ka shpallur kandidaturën si i pavarur për Kryetar të Komunës së Strugës.
Kandidimi i tij ka ardhur si përgjigje ndaj kërkesës së vazhdueshme nga komuniteti i biznesit dhe nga një pjesë e gjerë e qytetarëve dhe grupeve të interesit të Strugës, të cilët e shohin zotin Qyra një figurë të besueshme, me integritet të lartë dhe me përvojë të dëshmuar në zhvillim ekonomik dhe menaxhim të suksesshëm.
Në një moment kur Struga ka nevojë për vizion të qartë, investime strategjike dhe udhëheqje efikase, figura e z. Mendi Qyra vjen si një alternativë serioze për ndryshimin dhe zhvillimin e qëndrueshëm të kësaj komune me bukuri të rrallë natyrore dhe potencial të madh ekonomik.
Kandidatura e tij ka marrë sot një mbështetje të fuqishme edhe nga Forumi Ekonomik Mbarëshqiptar, një strukturë që përfaqëson interesat e bashkëpunimit ekonomik mes shqiptarëve në rajon dhe diasporë.
“Struga ka nevojë për punë, jo për fjalë. Ka nevojë për investime, jo për premtime boshe. Unë jam gati të vë përvojën time në shërbim të qytetit tim.”, është shprehur z. Qyra.
Figura të spikatura si z. Mendi Qyra i bëjnë nder komunitetit të’ Strugës dhe gjithë shqiptarëve, sepse përfaqësojnë vlerat e punës, të suksesit dhe të përkushtimit ndaj së mirës së përbashkët.
