Nga faqet e “Koha Jonë” në vitet ‘90 deri në podiumet ndërkombëtare, Edi Rama ka ndërtuar një profil politik që nuk shmang përplasjen. Përkundrazi, shpesh e kërkon. Nga përballjet me kundërshtarët vendas si Sali Berisha, tek ironitë publike me liderë të mëdhenj ndërkombëtarë, Rama ka treguar një stil të papërmbajtur: i drejtëpërdrejtë, sfidues, dhe jo rrallë – i pakorrigjueshëm.
Me Berishën: Një duel që s’ka përfunduar
Konflikti i Ramës me Berishën ka qenë ndoshta përplasja më e gjatë dhe më e ashpër në politikën shqiptare. Që nga ditët kur ishte ministër kulture dhe e quante “doktorin” simbol të regresit, e deri më sot kur e identifikon si “non-grata” dhe “njollë e errët e së kaluarës”, Rama nuk ka kursyer asnjë epitet.
Families of 737 MAX Crash Victims Seek Justice
Keep Watching
“Berisha është një relike e së kaluarës që po përpiqet të mbijetojë me zhurmë, jo me ide,” ka deklaruar shpesh Rama. Dhe kur Berisha e ka akuzuar për “shkatërrim të vendit”, Rama është përgjigjur me tallje, ironi, por edhe me statistika ndërkombëtare për rritjen e ekonomisë apo turizmit.
Me ndërkombëtarët: Jo gjithmonë korrekt, por gjithmonë i qartë
Nuk është vetëm me kundërshtarët lokalë. Rama ka zgjedhur të flasë hapur edhe kur përballë ka patur figura si Emmanuel Macron, Angela Merkel apo Charles Michel. Gjatë bllokimeve për hapjen e negociatave me BE-në, Rama tha:
“Nuk është Shqipëria që ka dështuar, por Bashkimi Europian që ka rënë në një krizë premtimesh të pambajtura. Mos prisni që ne të heshtim.”
Kjo deklaratë e vitit 2019 bëri jehonë në Bruksel. Po ashtu, gjatë samiteve të Ballkanit, Rama nuk ka hezituar të thotë atë që shumë liderë të vegjël nuk guxojnë. Ka kritikuar kancelarë e presidentë për “hipokrizinë ndaj Ballkanit”, madje në një rast edhe për stilin e vjetër burokratik të BE-së.
Me Nigel Farage: Një ftesë me kunja
Reagimi i fundit ndaj Nigel Farage është vetëm shembulli më i fundit i gjuhës sfiduese të Ramës. Farage deklaroi se “1 në 50 shqiptarë në Britani është në burg”, dhe Rama iu përgjigj me ironi:
“Nëse është e vërtetë, angazhohem publikisht të të kërkoj falje. Por nëse është thjesht karburant për tabloide, ejani në Shqipëri si i ftuar nderi.”
Kjo është gjuha e tij: pa frikë, pa dorashka, e drejtpërdrejtë. Jo domosdoshmërisht diplomatike, por ndonjëherë më efektive se diplomacia vetë.
Edi Rama: Sfiduesi që ka ndërtuar markën e vet
Rama është ndër të paktët liderë në Ballkan që ka guxuar të shfaqet si artist në politikë dhe si politikan që sfidon klishetë. Ai përdor x, ish Twitter si mjet për reagime të menjëhershme, fjalimet si mjete për përçuar mesazhe të forta, dhe debatet publike si arenë për të shpalosur epërsinë e tij retorike.
Nuk është i përkryer. Por është i qartë. Nuk është gjithmonë i saktë, por gjithmonë është i pranishëm në debat. Dhe për një vend të vogël në një botë që shpesh nuk dëgjon, ndoshta kjo është mënyra më efikase për t’u dëgjuar. (Dritare.net)
