Nuk kanë të sosur sulmet e Sali Berishës në drejtim të kreut të SPAK, Altin Dumani i cili tha në bashkëbisedimin informal me gazetarët se denoncimet e opozitës për shitblerje të votës nuk kanë qenë të shoqëruara me prova.
Berisha e quajti Dumanin avokat të krimit elektoral dhe përgjegjësin e dytë pas Ramës për të ashtëquajturën farsë të 11 majit.
“Të garantoj se asnjë kallëzim, asnjë kallëzim të vetëm penal, opozita nuk ka bërë pa provat zyrtare të pakundërshtueshme. Shiko çfarë bën; pasi s’ka reaguar, tani thotë se ato nuk bazohen. Asnjë padi e jonë nuk bazohet pa prova. Kurrë.
Në fakt, ne e dimë që ai është avokat kryesor i krimit elektoral të Edi Ramës. Ndaj dhe akuzojmë atë si përgjegjësin e dytë pas Edi Ramës, për farsën elektorale. Është skandal të thotë se nuk kanë prova.
Ai mbron gjyqtaren e Posaçme Irena Gjoka, e cila ka kallëzuar Berishën për shpifje, pas akuzave publike të bëra nga ky i fundit drejt saj! Me Irenën me 5 mbiemra, të cilën për ta mbrojtur nga krimet e saj, i hap çështje penale pa emër në mënyrë që të thotë po hetoj dhe të na dalë nesër se dikush ia ka grabitur pasaportën Irenës dhe ka shkuar në Janinë dhe është dënuar me burg personi që i ka grabitur… ose ndonjë tjetër, ndonjë trillim.
Pra, hapja e çështjes pa emër për Irena Gjokën në një kohë kur ajo ka 3 vepra penale, ka mashtruar në formularin e vetingut, ka mashtruar në formularin e dekriminalizimit, ka fshehur burgun për të cilën ajo nuk do mund të ishte kurrë gjykatëse, por duhej të ishte në burg”
Një javë më parë… “Altin Hajri, famoz, vrasës brutal, një njeri, pronar lokali në të cilin u nda në copa trupi i Jan Prengës, gjoja në kërkim, merr pjesë aktive në fushatën elektorale dhe kërcënon demokratët. Ky vrasës i shpërfytyruar thuhet se ka paguar për të shmangur akuzën për vrasjen në fillim gjer në 700 mijë euro dhe është lakuar emri i Altin Dumanit”
Po sot menjëherë pas tij doli publikisht me fyerja dhe shantazh i pandehurit Malltezi, i cili po përballet me drejtësinë në çështjen e shumëpërfolur të kompleksit “Partizani”, duke përdorur të njëjtën gjuhë të ashpër si vjehrri i tij, duke e cilësuar Dumanin “ose peng, ose të pafytyrë ekstrem”. Ai i është referuar një vendimi të fundit ku, sipas tij, “kërkohet konfirmimi i faktit penal”, duke e cilësuar këtë një akt të papranueshëm për një organ hetimor serioz.
“Sa palaço duhet të jesh që të thuash se “duhet konfirmuar fakti penal”? Ose je peng ose i pafytyrë ekstrem:
1. Irena me 3 mbiemra ka 2 dëbime nga Greqia për të cilat ka firmos prokurë për ti kundërshtuar
2. Ka 1 dënim penal të formës së prerë e cila ka ardhur me vulë apostile (forma më e lartë e çertifikimit)
3. Ka mashtrim me paratë e pista të paktë për 60 milion lekë që ka paraqit në veting kobtratë gjoja të 1996 me nene të kodit civil të 2015!
4. Ka falsifikim formular dekriminalizimi se nuk ka paraqit as dëbimet e as dënimin në Greqi.” – shkruan Malltezi.
Sulme të tilla përbëjnë një presion të drejtpërdrejtë ndaj drejtësisë, por asnjë reagim zyrtar nuk ka ardhur deri më tani nga institucionet përkatëse, ndërsa retorika e linçimit publik duket se po kthehet në mënyrë efikase për Berishën dhe familjarët e tij, të cilët po e shantazhojnë drejtësinë me të gjithë format dhe mënyrat
Dhe shpifjet publike të Berishës vazhdojnë çdo ditë.
Përse hesht Altin Dumani kur edhe ky Berisha dhe dhëndrri i tij janë qytetarë shqiptarë dhe kanë të gjitha të drejtat dhe detyrimet ligjore si çdo shtetas?
Si ështe e mundur që një bisedë telefonike e Erion Veliajt u transkriptua si shantazh kur ishte një bisedë familjare me bashkëshorten e tij dhe klithmat dhe ulërimat publike të Berishës na qenkan “cicërima” që veshi i Dumanit nuk i dëgjon?
Këto akuza publike të pandalshme dhe histerike të bëjnë të besosh se diçka është e vërtetë, e në mos gjithëçka një pjesë e mirë dhe nëse do ishin 30% të vërteta do e rrezikonin shumë të ardhmen e Dumanit.
Por këtë gjë do e marrim vesh në gjykatë ku Berisha duhet të paraqesi fakte nëse Dumani ngre akuzë për shpifje, intimidim dhe kërcënim ndaj funksionarëve të drejtësisë./Ekskluzive.al
