Një video është bërë virale në rrjet, në të cilën hoxha nga Prizreni Mazllam Mazllami shfaqet duke përdhosur flamurin shqiptar. Video po qarkullon me shpejtësi në rrjet, ndërsa ky veprim i Hoxhës është mjaft i pahijshëm.
Ai shfaqet në video me flamurin shqiptar në dorë teksa e quan arnë edhe leckë. Ai thotë se shqiptarët janë myslimanë ndaj nuk duhet të adhurojnë shqiponja.
“Kjo është arrnë, leckë, bezë. Këta kur e kemi qitë për 28 Nëntorin… Edhe mos me qitë hiç, kurrgja s’bahet kijameti.
Populli ynë, populli shqiptar janë muslimanë 80%, e njohin ma paganizmin çka është. Na nuk adhurojmë shqiponja, nuk adhurojmë zogj”, thotë hoxhë Mazllami.
Pasi video u bë virale, Mazllami reagoi duke thënë se video u shkëput qëllimisht nga disa persona që ia duan të keqen.
“Të nderuar vëllezër dhe motra: Video e cila është duke qarkulluar në disa portale nuk është e plotë, është shkëputur qëllimshëm nga disa dashakeqës. Kjo është deklarata e plotë e imja rreth qëndrimit tim për flamurin kombëtar. Patriotizmi (Flamuri kombëtar) – dashuria ndaj atdheut”, shkroi ai.
Mazllami ka publikuar videon e plotë të realizuar në vitit 2022 me rastin e festave të nëntorit.
