Konfliktet e brendshme në Partinë Demokratike kanë marrë një kthesë dramatike. Në qendër të furtunës është Belind Këlliçi, një prej zërave më të fortë publikë të opozitës, që tani akuzohet nga brenda vetë kampit të tij për lidhje të dyshimta me zëvendëskryeministren Belinda Balluku dhe për heshtje të qëllimshme ndaj aferave të saj. Editoriali i portalit “Timoni.al”, që sipas mediave besnike të Veliajt është i njohur për lidhjet me linjën e Sali Berishës, ka hedhur dje akuza direkte ndaj Këlliçit, duke e portretizuar si “opozitar ditën, mburojë të Ballukut natën”.
“Këlliçi është përpjekur me ngulm të ndërtojë një profil politik si ‘i pakompromis’ me të keqen, si një opozitar që nuk ndalet para askujt dhe që gjoja kërkon të çojë para drejtësisë eksponentët më të korruptuar të qeverisë socialiste. Por kur hetimi prek qeveritaren më të fuqishme të kabinetit, Belinda Ballukun, që rastësisht është edhe një lidhje e afërt familjare e vetë Belindit, sulmi ndalet, e madje shndërrohet në presion ndaj drejtësisë,” shkruhet në editorialin e “Timoni.al”. Sulmi përforcohet me pretendime për lidhje të drejtpërdrejta familjare dhe konflikte interesi që, sipas portalit, shpjegojnë heshtjen e Këlliçit për çështjen Balluku. “Sipas burimeve të brendshme dhe raportimeve të përsëritura mediatike, vëllai i Belind Këlliçit ka shërbyer si konsulent pranë Ministrisë së Infrastrukturës në kohën kur ajo drejtohej nga Belinda Balluku.
Ky fakt nuk është thjesht një detaj dytësor: është një konflikt interesi i qartë dhe një lidhje që e shpjegon më shumë se çdo gjë tjetër sjelljen e Këlliçit në këtë aferë”, vijohet më tej. Editoriali kulmon me një akuzë që shkon përtej një figure individuale, duke e lidhur emrin e Këlliçit me krizën e thelluar të besimit brenda opozitës shqiptare: “Belind Këlliçi sot nuk është më thjesht një politikan i ri me retorikë të fortë. Ai është një simbol i krizës së besimit që ka përfshirë opozitën shqiptare. Një figurë që përdor drejtësinë si kartë politike dhe interesin publik si dekor për mbrojtjen e interesave private”.
Zbardhet misteri i molotovëve
Tashmë janë vetë demokratët që i japin përgjigje pyetjes që shtroi publikisht për SPAK disa ditë më parë Erion Veliaj. Ai la të kuptuar në letrën publike se protestat para bashkisë të udhëhequra në plan të parë në atë kohë nga Belind Këlliçi, janë koordinuar me qëllim, në të njëjtën kohë me hetimin që nisi ndaj tij SPAK. “A u hetua ndonjëherë dhuna 1-vjeçare, me molotovë e zjarr, përpara Bashkisë së Tiranës, e kryer nga individë të maskuar që, sipas raportimeve, transportoheshin nga rrethe të tjera?
Kush e koordinoi dhunën që të përkonte me vetting-un tim të paligjshëm? Kush e financoi për 45 javë?”, pyeti Veliaj. Kryebashkiaku nuk përmendi emër konkret, por akuzat që vijnë nga demokratët duke e përforcuar dhe me qëndrimin e disa kohëve më parë të Arben Ahmetajt, i cili nga arratia në Zvicër tha se Balluku ka paguar njerëz të opozitës, pra Belind Këlliçin për të protestuar kundër Veliajt zbardhin misterin e molotovëve. Pra goditja ndaj Veliajt është produkt i një bashkëpunimi mes eksponentëve të qeverisë dhe figurave kyçe të opozitës. Gazeta e tha në një artikull të kaluar gjithashtu se nga denoncimet dhe akuzat publike dyshohet se pas Nesti Angonit, emrit të rremë që çoi kallëzimin në SPAK për Veliajn fshihet Balluku. Ishin mbrojtësit mediatikë të Veliajt, që përveç opozitës së Berishës dolën hapur duke thënë se kryebashkiaku është goditur nga Belinda Balluku.
“Pra, denoncuesi anonim i ka kërkuar SPAK-ut të gjurmojë, pasi sipas tij Veliaj ka qenë me një person tjetër në të njëjtin avion. Pikëpyetja që natyrshëm ngrihet, është se si e ka gjetur ky anonim inekzistent aksesin për të gërmuar në regjistrat e Aviacionit Civil dhe të gjejë një informacion kaq konfidencial se në avion me Veliajn 20 vite më parë ka qenë dhe një person tjetër, biznesmen, kur sistemi TIMS as nuk ka ekzistuar në atë kohë. Kush është burimi i “kallëzuesit anonim shumë të informuar” që ka gjetur një dokument jo publik nga lista e Aviacionit Civil” shkruanin disa javë më parë mediat pranë Veliajt. Dihet që “duart” te Aviacioni Civil mund t’i fuste vetëm Balluku
