Në një rrëfim të rrallë dhe emocionues të publikuar në rrjetet sociale, Dr. Tritan Kalo, mjeku infeksionist që pa për herë të parë plagët e rënda të Edi Ramës pas atentatit të 22 janarit 1997, zbulon detaje të pathëna deri më sot. Ai tregon si “xhupazinj të SHIK-ut” e masakruan me leva për ta eliminuar politikisht, ndërsa Rama luftonte për jetën në QSUT, ku Kalo i dha ndihmën e parë me profesionalizëm dhe përkushtim të plotë.
Por pavarësisht miqësisë së gjatë me Kryeministrin, Dr. Kalo nënvizon se profesionin humanitar dhe politikën i ka ndarë gjithmonë me vijë të kuqe, duke qëndruar i paanshëm dhe duke folur hapur për çdo çështje, pa kompromis. “Një mik në nevojë është një mik i vërtetë”, kjo moto e ka shoqëruar në çdo hap për ndihmën ndaj Ramës në kohët më të errëta. Në një reflektim të thellë nga Kanada, ku jeton sot, mjeku i dashur thotë se Shqipëria ende nuk ka dalë nga tranzicioni “demon-kratik”, edhe pse në vitin 2013 i dha 1 milion vota ndryshimit që nuk erdhi kurrë. Ai apelon për reflektim dhe shpresë për të ardhmen, duke mbajtur të gjallë dashurinë për atdheun edhe nga larg, 13.600 km larg Tiranës.
Pra ky rrëfim i fuqishëm na kujton se miqësia dhe humanizmi mund të shkojnë përtej politikës, dhe se e vërteta, edhe kur dhëmb, është themeli për të ndërtuar një të ardhme më të mirë. Ndërkohë më poshtë po pasqyrojmë reagimin e plotë të Dr. Kalos, i cili vjen disa ditë pas intervistës së dhënë për median gjermane “Zeit”, nga kryeministri Edi Rama, i cili ndër të tjera u ndal gjatë (si rrallë herë më parë) në shumë etapa të shkuara të jetës së tij, njëra prej tyre ishte dhe sulmi që ju bë shumë kohë më parë, në vitin 1997.
REAGIMI I PLOTË I MJEKUT TË NJOHUR INFEKSIONIST, TRITAN KALO
Një mik në nevojë është një mik i vërtetë
““A friend in need is a friend indeed” (“Një mik në nevojë është një mik i vërtetë”)…. Shtysën për këtë postim ma dha një intervistë e Kryeministrit të vendit dhënë dy gazetarëve gjermanë, në të cilin përmendet edhe një episod i trishtë nga jeta e tij opozitare e ndodhur më 22.01.1997, kur disa “xhupazinj të SHIK-ut” të asaj kohe e masakruan me levë për ti marrë jetën…. Edi Rama ka lindur në Pallatin 18, Shkalla 1 në Rrugën “Muhamet Gjollesha”, ku edhe unë banoja që në Dhjetor të 1962…. Jemi fqinj të vjetër dhe disa shkaqe subjektive dhe objektive e forcuan miqësinë tonë, sikundër edhe e kanë dobësuar atë… Si MANTELBARDHË deri më tash i panjolltë e asistova mikun tim që të kapërcente ato javë të vështira të pas “të atij masakrimi shikas miqësor”, sepse humanizmi i mjekut nuk njeh dhe kurrë nuk duhet të njohë barriera qofshin ato shoqërore apo politike…..
Mjeku vetsakrifikohet me Punën, me Profesionalizmin dhe Përkushtimin e tij duke ofruar më të mirën, për të përmirësuar dhe shpëtuar jetët e të tjerëve…. Jo më kot më kanë quajtur Nënë Tereza i Qendrës Spitalore Universitare “Nënë Tereza” të Tiranës…. Në tollovinë e ngjarjeve të Marsit 1997, ndërsa Edi Rama ndodhej në Paris, ai i ofroj sime shoqeje dhe dy vajzave të mëdha strehë për disa ditë në studion e ti, kur ato u evakuuan nga Shqipëria në atë ferr të një praglufte civile me personelin e Ambasadës Franceze, për çka edhe publikisht i kam shprehur dhe kurdoherë do ti shpreh mirënjohjen time….
Dr. Tritan Kalo rrëfen ndarjen e profesionit humanitar nga politika
Vetë nuk pranova të largohesha me stafin e Ambasadës ku unë isha akredituar prej Ministrisë së Jashtme franceze si mjek personeli, me qëllim që të vijoja ofrimin e ndihmesës sime ndaj të sëmurëve të Shërbimit Infektiv në QSUT…. Në miqësinë me Edi Ramën ka patur, ka dhe do të ketë ditë plot diell por edhe plot vranësira e stuhi shiu, POR unë si Dr. Tritan Kalo as dje, as sot dhe as nesër nuk mundet të përziej në një enë të vetme Profesionin tim Humanitar, me dritë-hijet e sjedhjes dhe të veprimeve Politike të kojshiut tim sot Kryeministri i vendit…. Kam qenë dhe mbetem VETVETJA, ndaj edhe kurdoherë haptazi jam shprehur për atë çka unë mendoj…. E vërteta dhëmb të dëgjohet, por ajo ndihmon që kurdoherë të korrigjojmë fjalët dhe veprimet tona…. Miqësia e vërtetë shprehet vetëm në ditë të vështira, kur ajo nevojitet të shfaqet si e tillë. Lajkat e thëna ndaj nesh kanë ndoshta një miklim shpirtëror dhe ngrohje e lartësim të UNIT, por ato kurrë nuk bartin për asnjë dekikë të vetme vërtetësi dhe thellësi të qëndrueshme….
Reflektim nga Kanada për Shqipërinë dhe të ardhmen e saj
Jam rritur dhe edukuar nga dy prindër të mrekullueshëm, të cilët ishin të kursyer në fjalët lavdëruese ndaj nesh si fëmijët e tyre, por edhe ndaj kujtdo që nuk i meritonte ato pavarësisht nga pozita e tyre shoqërore apo partiake…. Në Qershor 2013 ju ofruan Edi Ramës dhe Rilindjes/ish-PS së 12.06.1991 jo pak por 1.000.000 vota, për t’i dhënë fund Tranzicionit DEMON-KRATIK, gjë që nuk ndodhi përkundrazi…. Gjasat nuku duken se kjo gjë do të marrë fund edhe përgjatë mandatit të katërt qeverisës, hymë apo jo në BE në fund të tij…. Qofsha i gabuar dhe Mëma Natyrë më ndjeftë nëse gaboj për atë çka shkruaj më lart…. DEMON-KRACIA “Made in Albanistan” u nis keq me ngjarjet e 2 Prillit 1991 në Shkodër, dhe fillimi i keq ishte gjysma e së keqes që do të vinte në vitet në vijim…. Më e mira u bëftë për Atë-Dheun tim, të cilin e bart në çdo qelizë timen edhe këtu në Victoria, BC, Canada plot 13.600 km larg tij…. Together forever and ever! N.B.: Ripostimi mundet të bëhet VETËM kur respektohet tërësia e tij”, mbyll reagimin mjeku i dashur, Tritan Kalo. /Rigels Seliman
