Kritikat publike të kryeministrit Edi Rama ndaj disa gjyqtarëve janë shtuar kohët e fundit, duke u shndërruar në një ‘konflikt’ të hapur mbi lirimin e hapësirave publike.
Pas nisjes së aksionit për heqjen e ndërtimeve pa leje dhe strukturave të jashtme në plazhe e qytete, Rama ka akuzuar disa gjyqtarë se me vendimet e tyre po pengojnë zbatimin e ligjit nga ana e qeverisë.
I pari në shënjestër ishte gjyqtari Hazbi Balliu, i cili pezulloi tjetërsimin e një godine të konfiskuar nga KKT. Pas tij, gjyqtari Klarent Demiri u kritikua publikisht nga Rama për dy vendime sigurie që, sipas kryeministrit, lanë të zaptuara hapësira publike. Më pas, radha i erdhi gjyqtarit Ligoraq Toshi, i cili u kritikua për pengimin e prishjes së një objekti pa leje me kupolë xhami në Tiranë.
Më 29 gusht, Këshilli i Lartë Gjyqësor nëpërmjet një reagimi të beftë ka folur për reagime të subjekteve publike apo private që cenojnë figurën dhe dinjitetin e gjyqtarit dhe minojnë pavarësinë e gjyqësorit. Pavarësisht se nuk e përmendën me emër, ishte e qartë se kishte të bënte me deklaratat e fundit të Kryeministrit Rama. Por Rama nuk u tërhoq: në po të njëjtën ditë ai reagoi duke u shprehur se “gjyqtarët nuk janë maliqër”. Ai nënvizoi se është pikërisht KLGJ-ja dhe Inspektori i Lartë i Drejtësisë (ILD) që duhet të veprojnë ndaj këtyre rasteve
Kjo përplasje e Ramës me gjyqtarë që shkelin ligjin është një debat që duhet zhvilluar në kornizat e respektimit dhe pavarësisë së gjyqësorit, mirëpo duhet bërë edhe për çështje të tjera që kanë të bëjnë me mbrojtjen dhe cenimin e dinjitetit njerëzor të të pandehurve, gjë që nuk është hiç e njohur në strukturat e re të drejtësisë në Shqipëri. Po ashtu, KLGJ-ja, e cila shqetësohet për cenimin e punës dhe pavarësisë, duhet të reagojë edhe në raste të tjera, kur politikanë të tjerë sulmojnë dhe linçojnë gjykatës të caktuar, duke dhënë kështu një standard paanësie dhe profesionalizmi. Nga ana tjetër, të gjithë shqetësimet dhe ankesat e Kryeministrit Rama, ata duhet t’i trajtojnë dhe të shprehen në qëndrojnë apo nuk qëndrojnë, duke i dhënë kështu përgjigje jo vetëm drejtuesit të qeverisë, por duke bërë edhe punën e tyre./ TemA
