Mark David Chapman, njeriu që vrau ikonën e muzikës John Lennon në vitin 1980, është refuzuar për herë të 14-të nga bordi i faljeve në shtetin e New York-ut, sipas autoriteteve të burgjeve.
Vendimi u mor më 27 gusht, kur Chapman, tashmë 70 vjeç, doli para bordit të faljeve. Rezultati i seancës u publikua së fundmi në faqen zyrtare të Departamentit të Shërbimeve Korrektuese dhe Mbikëqyrjes së Komunitetit.
Më 8 dhjetor 1980, Chapman i mori jetën Lennon-it jashtë apartamentit të tij në Upper West Side të Manhattan-it, teksa këngëtari dhe gruaja e tij, Yoko Ono, po ktheheshin në shtëpi. Ironikisht, vetëm disa orë para krimit, Lennon i kishte firmosur një autograf Chapman-it mbi kopertinën e albumit të tij të ri, Double Fantasy.
Pas të shtënave, Chapman nuk tentoi të arratisej. Ai u gjet ulur pranë vendngjarjes, duke lexuar romanin “The Catcher in the Rye” të JD Salinger — një detaj që më vonë u bë pjesë e analizave psikologjike të motivit të tij.
Në dëshmitë e mëparshme para bordit, Chapman ka shprehur pendesë të thellë për aktin. Në një seancë të mëhershme, ai kishte thënë:
“E dija çfarë po bëja, e dija që ishte e keqe, e dija që ishte e gabuar, por doja aq shumë famën, saqë isha i gatshëm të jepja gjithçka dhe t’i merrja jetën një njeriu.”
Chapman është duke vuajtur një dënim me burgim të përjetshëm në Green Haven Correctional Facility, një burg me siguri të lartë në veri të New York-ut. Ai është i burgosur atje që nga fillimi i viteve ’80 dhe ka kërkuar lirim me kusht që prej vitit 2000.
Kërkesa e tij e radhës për lirim me kusht është caktuar për shkurt 2027.
John Lennon, legjendë e muzikës botërore dhe ish-anëtar i The Beatles, ishte vetëm 40 vjeç në momentin e vrasjes. Vdekja e tij tronditi miliona fansa dhe vazhdon të jetë një nga ngjarjet më të errëta në historinë e muzikës moderne.
