Nisja e sezonit të ri parlamentar evidentoi problemet e vjetra të opozitës shqiptare. Ndonëse në 11 Maji mori rezultatin e saj më të dobët, shfaqja e ofruar në ditën e parë tregoi se nuk ka nxjerr asnjë mësim nga zgjedhjet e fundit.
Dhuna dhe kaosi në Kuvend nuk janë as alternativë as rrugë që e nxjerr diku opozitën shqiptare. Është sikur të provosh gjithmonë të njëjtën metodë dhe të presësh rezultate të ndryshme. E provoi rrugën e bllokimit të seancave plenare dhe të komisioneve parlamentare gjatë periudhës 2022-2024 dhe jo vetëm që nuk nxori gjë në dritë, por thelloi edhe më tej humbjen.
Duke mos i shkaktuar asnjë problem qeverisjes dhe mbarëvajtjes së punës së Parlamentit, kjo sjellje vetëm se e ndihmon mazhorancën socialiste, e cila do t’i kalojë ligjet që dëshiron pa debat dhe pa diskutime, por vetëm me votim formal.
Në vend që të bëjë detyrën e vet parlamentare për të cilën e kanë mandatuar qytetarët, opozita dhe PD zgjedh të japin shfaqje, duke gënjyer vetveten se janë duke bërë ‘revolucion’.
Mirëpo, revolucioni që të ndodhë duhet t’i përgjigjen shqiptarët në sheshe dhe rrugë, kështu që, meqenëse kjo nuk ndodh, shpresat e revolucionit kanë ngelur te Muli dhe Gazi.
Tani paramendo se ku i ka varuar shpresat kjo opozitë dhe e kupton se jo vetëm që nuk ndryshon, por, mbi të gjitha, nuk ka pikën e dëshirës për të ndryshuar dhe për t’u rinovuar.
