Pas pezullimit të dialogut strategjik me Kosovën, Departamenti Amerikan i Shtetit thotë për Report Tv se dëshiron që të ecë përpara me qeverinë në detyrë, por shtoi se ka nevojë për një partner të përkushtuar dhe që kupton nevojën për evitimin e veprimeve destabilizuese.
Duke rikonfirmuar se SHBA-të mbeten pranë Kosovës, DASH thekson gjithashtu se do të vlerësojnë veprimet e qeverisë në detyrë për të ndërmarrë veprime të mëtejshme. Megjithatë, DASH thotë në një përgjigje për gazetarin e Report Tv, Ermal Qori se SHBA i nxit partnerët të punojnë në mënyrë konstruktive për ta siguruar stabilitetin dhe sigurinë.
“SHBA-ja gjithmonë do të jetë mike e afërt e popullit të Kosovës, dhe ne jemi plotësisht të përkushtuar ndaj partneritetit tonë. Megjithatë, SHBA-ja i nxitë partnerët të punojnë në mënyrë konstruktive për ta siguruar stabilitetin dhe sigurinë. Ne duam të ecim para me qeverinë e përkohshme, por na duhet një partner që kupton nevojën për t’i evituar veprimet destabilizuese dhe është i përkushtuar për të çuar përpara stabilitetin rajonal dhe të mbrojë të drejtat e gjithë qytetarëve të Kosovës. Ne do të vazhdojmë t’i vlerësojmë veprimet e qeverisë në detyrë. Nuk kemi asgjë për të shtuar në këtë pikë”, thuhet në përgjigjen e DASH për Report Tv.
Më 12 shtator, Shtetet e Bashkuara njoftuan se kishin pezulluar dialogun strategjik për shkak të shqetësimeve në lidhje me veprimet e qeverisë në detyrë, që sipas amerikanëve, kanë rritur tensionet dhe paqëndrueshmërinë, duke kufizuar aftësinë për të punuar për prioritetet e përbashkëta. Ky veprim ngjalli reagime të shumta nga opozita, duke e konsideruar si një goditje të rëndë ndaj Kosovës dhe qeverisë së Kurtit.
