Mos bëni si bëj unë, bëni si them unë. Sali Berisha e ka arritur fitoren e parë ndaj drejtësisë së re. Shoqata e Gjyqtarëve të Shqipërisë reagoi me urgjencë ndaj kritikave të fundit të kryeministrit Edi Rama për gjyqtarin e administratives, Marko Boshku.
“Shoqata Kombëtare e Gjyqtarëve të Republikës së Shqipërisë konstaton e revoltuar se sërish kreu i ekzekutivit shqiptar, në një mënyrë tërësish të paprecedentë dhe të papranueshme, ka sulmuar një tjetër gjyqtar të Gjykatës Administrative të Shkallës së Parë Tiranë, z. Marko Boshku. Shoqata u garanton të gjithë gjyqtarëve të Republikës së Shqipërisë se ajo nuk do të tolerojë asnjë veprim, shfaqje apo koment fyes e poshtërues të kryer nga funksionarë të lartë shtetërorë, të kujtdo pushteti që ata t’i përkasin”
Por në të njëjtën ditë, jo nga rrjetet sociale por nga dyert e SPAK dhe nën dritën e shumë kamerave e ekraneve, Berisha sulmoi një gjyqtare disa shkallë më lart se gjyqtari i administratives.
“Kjo nuk lidhet vetëm me Altin Troplinin, por lidhet edhe me Irenën me 5 mbiemra, me simotrën e tij siameze. Kur unë paraqita këtu në maj dokumentin me vulën apostile, këta zotërinjtë thanë se nuk e kemi marrë zyrtarisht. Këta nuk ndërmorën asnjë veprim, ndonëse ai dokument ishte i mjaftueshëm që KLP-ja famoze brenda tre javëve ta nxirrte nga detyra dhe ta çonte për ndjekje penale Irenën me 5 mbiemra.”
Por si ka mundësi, që Shoqata e Gjyqtarëve reagon për një gjyqtar të thjeshtë, e jo për një gjyqtare të drejtësisë së re?
Por presioni i doktorit mesa duket funksionon. Gjyqtarët para tij heshtin, kurse para Ramës ngrejnë zërin.
Kjo Shoqatë aktualisht drejtohet nga gjyqtari i Apelit te Gjykatës së Posaçme, Engert Pëllumbi, ose më saktë kolegu i Irena Gjokës. Dy vite më parë ai i riktheu Berishës masën e detyrimit të paraqitjes, madje u sulmua ashpër nga itharët e doktorit edhe për pamjen e tij fizike.
Kurse gjyqtari Boshku është i katërti që kritikohet nga Rama për vendimet e tij, por mesa gjyqtarëve i ka ngelur hatri diku tjetër me qeverinë.
Në qershor, nëpërmjet një tjetër shoqate gjyqtarët kërkuan rritje pagash për gjyqtarët në Gjykatën Kushtetuese, një kërkesë që u kritikua e kundërshtua publikisht nga kryeministri Edi Rama.
Dhe në një kohë kur Rama mbështet drejtësinë e re, Berisha në kampin e tij mbledh vetëm të vjetrit, si Gjin Gjoni apo Arjan Ndoja. Ky i dyti, një ish prokuror në Durrës, i shkarkuar nga Vetingu për lidhje të faktuara kriminale, i doli të hënën në mbrojtje gjyqtarit të kritikuar nga Rama.
“Në asnjë vend të botës nuk gjykohen gjyqtarët dhe as prokurorët për vendimet që ata japin, por për shkaqet dhe arsyet që i çuan ata që të japin këtë vendim.”
Ndoja është prokurori të cilin Rama e ka etiketuar si “KÇK” para atentatit ndaj tij në mbikalizimin e Shkozetit në 2021, por në kohën kur kryeministri e kritikonte, doktori çuditërisht heshte, dhe jo rastësisht 4 vite më pas e bëri dhe deputet.
Megjithatë, është e qartë se Rama ka mbetur i vetëm në kritikat e tij për drejtësinë, sidomos atë të vjetër, sepse mesa duket aty janë bërë bashkë gjyqtarët dhe Doktori kundër qeverisë dhe drejtësisë së re./abcnews.al
