Pasditja vonë e së mërkurës rezultoi dramatike për Venezuelën. Vendi u godit nga dy tërmete të fuqishëm 7.2 dhe 7.5 Rihter, lëkundjet e të cilëve u regjistruan rreth 1 minutë njëri pas tjetrit.
Pamjet e shpërndara nga aeroporti i Karakasit në momentet e lëkundjeve treguan forcën e dhunshme të tërmetit që rrëzoi dhjetëra e ndoshta qindra ndërtesa në gjithë vendin.
Pasojat në videot e shpërndara në rrjetet sociale pas qetësimit të situatës, janë të dukshme kudo, me rajonin La Guaira dhe Karakasin që raportohen si dy zonët më të prekura.
LEXO EDHE:
200 milionë dollarë për Venezuelën, FMN akordon fondet për rindërtimin pas tërmeteve
Banorë të Karakasit shprehën përjetimin e tyre teksa lëkundjet vrasëse filluan.
“Fatmirësisht, familja ime — gruaja ime, mbesa ime dhe unë — ishim jashtë pallatit. Kur u kthyem, pamë se ai ishte shkatërruar plotësisht. Për fat të mirë, edhe fqinjët arritën të shpëtonin jetën e tyre. Çfarë mund të them?”, tha një burrë.
“Isha ulur në kuzhinë kur ndjeva se gjithçka filloi të dridhej dhe pyeta: ‘Po dridhet?’ në shtëpi m’u përgjigjën: ‘Po, po, po lëkundet.’ Lëkundjet ishin vërtet shumë të forta. Unë thjesht qëndrova aty duke thënë: O Zot i madh, ja ku jam”, rrëfeu një grua.
Presidentja në detyrë Delcy Rodriguez, në një dalje emergjente për mediat bëri thirrje që njerëzit të qëndronin të bashkuar teksa vendi futej në fazën e menaxhimit të krizës dhe operacionit të kërkim shpëtimit.
“Në këtë moment me ndjeshmëri të madhe për popullsinë tonë, dhe për ata që fatkeqësisht kanë pësuar humbjen e një anëtari të familjes, ne shprehim ngushëllimet tona të menjëhershme. Po ashtu, duam t’i kërkojmë popullsisë bashkëpunimin maksimal. Dhe tani po shpallim gjendjen e jashtëzakonshme, siç parashikohet në Kushtetutën tonë. Dua të falënderoj qeveritë e botës që, menjëherë pasi ndodhën këto tërmete, kontaktuan Venezuelën për të ofruar solidaritet dhe mbështetje”, tha Rodriguez.
Bilanci i dytë i përditësuar nga zyra e presidentes flet për 160 persona të vdekur dhe 900 të plagosur dhe mbi 10,000 njerëz të zhdukur
Shërbimi Gjeologjik amerikan tha se eventi natyror mund të konsiderohej si ndër më të rrallët, për shkak se dy tërmete kaq të mëdhenj ndodhin në një hark kohor të shkurtër njëri pas tjetrit. Sipas institutit, bilanci me gjasë mund të arrijë në mijëra të vdekur dhe është më i forti i regjistruar ndonjëherë në brigjet e Venezeuelës dhe territorit të tij në 125 vitet e fundit.
Nga zona e La Guaira, e cila mendohet të jetë më e dëmtuara nga tërmetet, nuk ka të dhëna sipas zyrës së presidentes. Rajoni ndodhet pa energji elektrike më shumë ndërtesa të shembura dhe një pjesë e madhe e njerëzve kaluan natën në rruguë.
Shtetet e Bashkuara, Panamaja, Katari, Kuba, Nikaragua, Turqia, Jordania, Barbadosi, Kurasao, Kolumbia, Mbretëria e Bashkuar, Brazili, Meksika, Kombet e Bashkuara dhe organizata financiare kontaktuan menjëherë qeverinë venezueliane përmes kanaleve të ndryshme për të shprehur solidaritetin e tyre me popullin e Venezuelës.
Donald Trump tha në një status në Truth se dëmet në venezuelë janë të rënda. Mesazhe ngushëllimi shprehën liderë nga e gjithë bota mes tyre Ursula von der Leyen, Emmanuel Macron, Giorgia Meloni, Friedrich Merz apo edhe shefi i OKB.
