Gjatë punimeve të sotme të Kuvendit Kombëtar të protestuesve pati një sërë incidentesh të dhunshme. Por më i dhunshmi ishte ai ndaj ish-deputetit Jenisheri. Kuvendarët e nxorën atë jashtë si të papërshtatshëm për nivelin kulturor të Kuvendit.
Jenisheri rezistoi, por në fund e humbi rreshtin e parë dhe u ul nga fundi.
Kjo e irritoi shumë Mulin.
– Si ka mundësi, i tha Lelos, që gjithë ata budallenj aty dhe u duk më budalla Jenisheri?
– Është problem, i tha Lelo, se kur janë të gjithë budallenj, e njohin më lehtë budallain. Nga kjo shkaktohet edhe irritimi. Ndryshe është çështja në PD. Shumica janë të zgjuar dhe një budalla u duket i çuditshëm, ndaj i hapin rrugë.
– Kjo është skandaloze, tha Muli. Në vend që të gëzohen që u shkon një njeri me përvojë politike, e nxjerrin jashtë.
– Të thashë pra, i tha Lelo. Kanë zili faktin që janë vetë në atë nivel dhe nuk e pranojnë kollaj njëri-tjetrin.
– Boll jam munduar edhe unë ta ul nivelin e Këshillit Kombëtar, tha Muli, por pak veta më refuzojnë. Kjo tregon që e kemi akoma të lartë nivelin. Duhet ta ulim edhe ca. Deri tani vetëm katër-pesë veta kanë folur. Kur të ngrihen të gjithë në këmbë kundër meje, atëherë kemi arritur aty ku duhet.
– Tani është akoma siç thashë unë, tha Lelo, që u duk si i çuditshëm.
– Duhet të bëjmë diçka që Jenisheri të kthehet në krye të tyre, tha Muli. Me atë merremi vesh kollaj, se ai biçikletë të re do dhe një nderimçatie. Këta të rinjtë e kanë dorën e rëndë.
– Provoje një herë, tha Lelo, por mos shpreso shumë, se mund të ketë rrjedhur dhe mendon që ka hyrë te Këshilli Kombëtar i PD-së aty. Nuk e di që është parti e re.
– Dhe po ka arritur në atë fazë, nuk na duhet më.
– E ke gabim, tha Muli. Atje ashtu na duhet, se garën me protestuesit e kemi. Kur ata të jenë më budallenj se ne, atëherë ne jemi opozita e parë.
– Nuk i dihet, tha Lelo, se varet kë do populli opozitar më shumë.
