Një ish-kuzhiniere e Marinës Mbretërore Britanike është dënuar me 18 muaj heqje lirie në një qendër paraburgimi ushtarak, pasi u shpall fajtore për një seri sulmesh seksuale ndaj kolegëve të saj në bordin e anijes luftarake HMS Dauntless.
Sian Dowsett, 25 vjeçe, u dënua nga Gjykata Ushtarake e Bulford në Wiltshire për gjashtë akuza për sulm seksual, pasi gjykata arriti në përfundimin se ajo kishte shënjestruar katër pjesëtarë më të rinj të ekuipazhit – dy gra dhe dy burra.
Gjatë procesit gjyqësor u zbuluan detaje të sjelljes së saj në bordin e anijes. Gjyqtari John Atwill e kritikoi ashpër 25-vjeçaren, e cila gjatë paraqitjes në gjykatë mbante në duar një lodër prej pelushi të personazheve Lilo dhe Stitch.
“Ju i shqetësuat, i frikësuat dhe i tronditët viktimat tuaja dhe nuk treguat asnjë konsideratë për ndikimin e sjelljes suaj. Ju ishit një grabitqare në atë anije dhe duket se kishit shënjestruar anëtarët më të rinj”, deklaroi gjyqtari.
Sipas dëshmive të paraqitura në gjykatë, Dowsett përdorte pozicionin e saj për të ushtruar presion dhe për të intimiduar kolegët. Ajo akuzohet se kishte kryer prekje të papërshtatshme ndaj marinarëve meshkuj, përfshirë prekjen e pjesëve intime, ndërsa ndaj kolegeve femra kishte kryer veprime fizike pa pëlqimin e tyre.
Shumë prej viktimave kishin hezituar të raportonin ngjarjet, për shkak të turpit dhe frikës nga reagimi i Dowsett, e cila u përshkrua si një person me sjellje agresive dhe intimidues.
Një prej viktimave femra deklaroi në gjykatë se kishte kaluar net të shumta pa gjumë gjatë kohës që shërbente në të njëjtën anije me të.
“Ajo ishte një person jashtëzakonisht kërcënues. Ajo bërtiste dhe u bërtiste njerëzve. Kishte akses të pakufizuar tek unë dhe sinqerisht besoja se mund të më sulmonte fizikisht”, tha ajo.
Një nga viktimat meshkuj, i cili tha se ishte sulmuar në repartin mjekësor dhe në një hangar të anijes, u shpreh i tronditur nga ajo që kishte ndodhur.
“Jam i turpëruar dhe i zemëruar me të. Dua që ajo të kuptojë peshën e veprimeve të saj dhe ndikimin që ato kanë pasur te viktimat”, deklaroi marinari.
Gjatë seancës, avokati i Dowsett, Michael Green, argumentoi se klientja e tij ishte diagnostikuar së fundmi me autizëm, gjë që mund të sillte vështirësi në ndërveprimet sociale dhe në përshtatjen me mjediset institucionale.
Megjithatë, gjykata vlerësoi se kjo nuk mund të shërbente si justifikim për veprimet e saj. Gjyqtari Atwill theksoi se këto ishin veprime që “çdo person e kupton se janë të papranueshme”.
“Këto vepra seksuale dëmtojnë besimin thelbësor mbi të cilin bazohet shërbimi ynë. Ato dëmtojnë kohezionin dhe efektivitetin e ekipit. Nuk ka vend për një sjellje të tillë në shërbimin e Madhërisë së Tij”, u shpreh gjyqtari.
Vendimi përfundimtar ishte 18 muaj heqje lirie në një qendër paraburgimi ushtarak.
