Kryeministri Edi Rama ka reaguar për protestat dhe përplasjet e ditëve të fundit në Tiranë, duke deklaruar se ka zgjedhur të qëndrojë jashtë përplasjes publike për të shmangur, sipas tij, “kurthin e dhunës”.
Në fjalën e tij, Rama tha se situata aktuale kërkon kujdes maksimal, duke përdorur disa herë shprehjen “kërkohet gjak” dhe duke e krahasuar klimën e sotme me 21 Janarin. Ai kujtoi se në protestën e vitit 2011 nuk pati molotovë apo djegie institucionesh, por katër protestues u vranë me armë zjarri dhe dhjetëra të tjerë u plagosën.
“Ja ku jam, nuk kam ikur. Gjithsesi, vendosa të jem këtu sot, të përpiqem të them gjërat e mia. Jam përpjekur të mos përfshihem dhe të ndjek e të koordinoj një përpjekje aspak të lehtë për të mos rënë në kurthin e ngritur të dhunës, që kërkon gjak. Kërkohet gjak. Dhe unë e di historinë e këtij bulevardi, e njoh mirë. Janë ende të freskëta në kujtesë, ato që ndodhën në 21 janar, ku pati disa zjarre sporadike tek tuk, në këtë perimetër, ku nuk u prek asgjë, asnjë institucion. Ku nuk u hodh asnjë molotov, ku nuk u dëmtua dhe nuk u dogj askush nga forcat e rendit dhe ku u vranë me plumba, 4 protestues dhe u plagosën dhjetëra të tjerë, që ndryshe nga sot, nuk shkonin dot as në spital”, theksoi ai.