Halloween-i i këtij viti duket se do të jetë një arsye më shumë për të bërë valixhet gati dhe për të udhëtuar drejt Europës. Me 31 tetorin që përkon me të shtunën, qytetet europiane ofrojnë një kalendar të pasur aktivitetesh, festash me kostume, shfaqjesh horror dhe argëtimi deri në orët e para të mëngjesit.
Sipas një renditjeje të publikuar nga Euronews, bazuar në një studim të ekspertëve të udhëtimeve të Adventure360, Europa është kontinenti që spikat për festimet e Halloween-it në vitin 2026, me pesë qytete në dhjetëshen më të mirë në botë.
Studimi analizoi 113 qytete në mbarë botën, duke marrë në konsideratë numrin e aktiviteteve të organizuara nga 30 tetori deri më 1 nëntor, ofertën e jetës së natës, restorantet që qëndrojnë hapur deri vonë, sigurinë dhe organizimin e festivaleve të veçanta. Çdo destinacion u vlerësua me një maksimum prej 100 pikësh.
Në krye të renditjes botërore qëndron Nju Jorku me 91.1 pikë, i ndjekur nga Çikago me 80.1 pikë. Por Europa nuk mbetet pas, me Edinburgun, Dublinin, Madridin, Londrën dhe Pragën që zënë pesë vende në dhjetëshen e parë.
Edinburgu është destinacioni europian që kryeson listën, duke u renditur i treti në botë me 79.2 pikë. Kryeqyteti skocez ofron një atmosferë të veçantë përmes festivalit Samhuinn Fire, që zhvillohet më 31 tetor në Calton Hill. Zjarri, muzika, akrobacitë dhe kostumet spektakolare rikrijojnë ritualet e lashta kelte që shënojnë fundin e verës dhe ardhjen e dimrit.
Në vendin e katërt global renditet Dublini me 73 pikë. Kryeqyteti irlandez është i lidhur ngushtë me trashëgiminë gotike dhe festivalin Bram Stoker, kushtuar autorit të romanit të famshëm “Drakula”. Nga 23 deri më 26 tetor, qyteti mirëpriti aktivitete të ndryshme, përfshirë parada, shfaqje horror dhe ture në vende historike.
Madridi renditet i shtati në botë me 70.7 pikë. Kryeqyteti spanjoll ofron festa me kostume, jetë nate dhe aktivitete për adhuruesit e filmave horror. Një prej atraksioneve kryesore është MADHORROR, që zhvillohet nga 30 tetori deri më 2 nëntor, ndërsa lagjja Malasaña njihet për festat dhe lokalet e saj të frekuentuara.
Londra mban vendin e tetë me 69.6 pikë. Me mbi 1,000 ambiente të jetës së natës, rreth 2,600 restorante që qëndrojnë hapur deri vonë dhe 22 aktivitete tematike, kryeqyteti britanik ofron alternativa për çdo shije. Mes tyre janë shëtitjet me ndriçime speciale në Kew Gardens, turet në gjurmët e Jack the Ripper dhe festa me muzikë në London Transport Museum.
Në vendin e dhjetë renditet Praga me 69 pikë. Arkitektura gotike, rrugicat mesjetare dhe legjendat misterioze e bëjnë qytetin një skenë ideale për Halloween. Më 30 tetor organizohet festa Wonderland Halloween, ndërsa klubi i njohur Karlovy Lázně pret aktivitetin Wicked Weekend.
Në 20 destinacionet më të mira botërore përfshihen edhe Roma, Berlini, Amsterdami, Barcelona, Budapesti dhe Lisbona, duke e bërë Europën një nga alternativat më tërheqëse për ata që duan ta festojnë Halloween-in larg shtëpisë.
11 qytetet europiane në renditjen e Adventure360:
Edinburg, Britani e Madhe – 79.2 pikë
Dublin, Irlandë – 73 pikë
Madrid, Spanjë – 70.7 pikë
Londër, Britani e Madhe – 69.6 pikë
Pragë, Çeki – 69 pikë
Romë, Itali – 68.6 pikë
Berlin, Gjermani – 67.4 pikë
Amsterdam, Holandë – 66.7 pikë
Barcelonë, Spanjë – 65.6 pikë
Budapest, Hungari – 65.4 pikë
Lisbonë, Portugali – 64.1 pikë.
