Testet toksikologjike për vdekjen e këngëtarit të njohur grek Giorgos Mazonakis kanë nxjerrë në pah praninë e disa substancave të fuqishme në gjakun e tij, duke shtuar pikëpyetjet mbi rrethanat që çuan në ndarjen e tij nga jeta.
Sipas mediave greke, në analizat e kryera janë identifikuar tri substanca kryesore: propofol, një anestetik me veprim të shpejtë; midazolam, një qetësues i fuqishëm; si dhe flumazenil, një medikament që përdoret për të kundërshtuar efektet qetësuese të benzodiazepinave, përfshirë midazolamin.
Analizat kanë evidentuar gjithashtu edhe përbërës të lidhur me medikamente të tjera që përdoren me recetë.
Prania e këtyre substancave ka rëndësi të veçantë për hetimin, pasi ekspertët duhet të përcaktojnë në çfarë sasie ndodheshin në organizmin e këngëtarit dhe nëse kombinimi i tyre ka pasur ndikim në gjendjen e tij shëndetësore.
Raporti përfundimtar i analizave të kryera në laboratorin mjekoligjor dhe toksikologjik të Universitetit Aristoteli të Selanikut pritet t’u dorëzohet autoriteteve në Athinë deri më 6 nëntor.
Ndërkohë, ekspertët presin edhe rezultatet e ekzaminimeve histopatologjike, të cilat do të ndihmojnë në përcaktimin e shkakut të vdekjes.
Kujtojmë se këngëtari ndërroi jetë më 9 shtator, pasi pësoi arrest kardiak në një klinikë private në Athinë, ku kishte shkuar për një procedurë plazmafereze.
Autopsia e kryer më 11 shtator nuk arriti të përcaktonte shkakun e vdekjes, duke e cilësuar atë si të papërcaktuar.
Për këtë arsye, rezultatet e reja laboratorike konsiderohen thelbësore për hetimin që po përpiqet të zbardhë se çfarë ndodhi në orët e fundit të jetës së artistit.