Ish-piloti australian i Formula 1, Alan Jones kampion bote në vitin 1980 me skuadrën Williams, është ndarë nga jeta në moshën 80-vjeçare. Ai ndërroi jetë të enjten, më 5 nëntor, pas një sëmundjeje të shkurtër, vetëm pak ditë pas ditëlindjes së tij.
Lajmi u konfirmua nga bashkëshortja e tij Amanda Butler-Davis, përmes një deklarate të publikuar nga Motorsport Australia.
“Jemi jashtëzakonisht të trishtuar të njoftojmë ndarjen nga jeta të Alanit tonë të dashur. Ai do të na mungojë shumë dhe do të kujtohet me dashuri nga familjarët dhe fansat e tij”, thuhet në deklaratë.
Jones debutoi në Formula 1 në vitin 1975 dhe regjistroi fitoren e parë në vitin 1977, në Çmimin e Madh të Austrisë. Karrierën e tij më të suksesshme e përjetoi me Williams, me të cilën në vitin 1980 fitoi pesë gara dhe siguroi titullin kampion bote.
Ai ishte australiani i dytë që fitonte kampionatin e Formula 1, pas Jack Brabham, si dhe piloti i parë që i dhuroi Williams titullin botëror. Në total, gjatë karrierës së tij, Jones fitoi 12 gara Grand Prix dhe mori pjesë në 116 gara të Formula 1.
Pas tërheqjes nga garat, ai vijoi të ishte pjesë e motorsportit si komentator televiziv në Australi, duke lënë pas një trashëgimi të rëndësishme në historinë e këtij sporti.
