Ministri i Financave, Arben Ahmetaj, dhe deputeti i PS, Erjon Braçe, janë përplasur sërish ditën e sotme. Ahmetaj dhe Braçe janë dy zëra në PS, që bëjnë shpesh debate dhe nuk gjejnë dakordësi për çështje të ndryshme.
Edhe ditën e sotme ka ndodhur e njëjta gjë, ku të dy figurat e PS kanë folur për të njëjtën çështje, por me qëndrime të ndryshme. Arben Ahmetaj, i cili vështirë të besohet, premtoi sërish sot se do të zhdukë lojërat e fatit, duke filluar nga 1 janari i vitit 2019.
“Duke filluar nga 1 janari 2019, dua ta deklaroj për qytetarët sepse deputetët e dinë, nuk do të ketë shtyrje të ligjit sa i përket largimit të kazinove elektronike nga qytetet. Në bazë të definicionit të ligjit do të ushtrohen klauzolat e rrallimit të zyrave të basteve, 1 në 200 metra”, tha ministri Ahmetaj.
Nga ana tjetër, Braçe foli me tone paksa më të zbutura, teksa nuk foli për mbyllje të lojërave të fatit, mabse duke e ditur që kjo gjë nuk do të ndodhë, por propozoi një rritje të mëtejshme të nivelit të tatimeve për lojërat e fatit.
“Për të riparë normën e taksimit të tyre. Unë kam një qëndrim të qartë në këtë aspekt, tatimi progresiv mbi të ardhurat nga kapitali duhet të shkojnë më tutje dhe mbi të gjitha tatimi progresiv mbi të ardhurat nga lojërat e fatit pa asnjë diskutim duhet të shkojë deri në masën 50%”, theksoi deputeti Braçe./Pamfleti
