Ende sot e kësaj dite nuk ka një përgjigje për aferën e lobimit me para të dyshimta të Partisë Demokratike në Shtetet e Bashkuara të Amerikës dhe shumat marramendëse që ajo u pagoi kompanive të lobimit.
Vetë Kryetari i Partisë, Lulzim Basha, nuk ka dhënë asnjë përgjigje se ku i gjeti shumat e majme që i pagoi Nick Muzinit dhe lobistëve të tjerë me lidhje ruse, por ndërsa vazhdon të lidhë të tjera kontrata lobimi, duket se ka gjetur një mënyrë të re për t’ju fshehur llogaridhënies publike mbi këto para: T’i bëjë shqiptarët të besojnë se të gjithë lobojnë me shuma marramendëse në SHBA, se të gjithë janë njësoj të përlyer si ai.
Për të qënë sa më bindës, Bashës i ka ardhur në ndihmë Fondacioni Politik Gjerman i demokratëve “Konrad Adenauer”, zyrtarët e të cilit janë shfaqur jo pak herë në Tiranë, në krah të Lulzim Bashës për të mbështetur veprimet e tij si aksioni opozitar kundër vetingut në bulevard.
Së fundmi, Fondacioni Konrad Adenauer ka publikuar një raport ku thuhet se “të gjithë udhëheqësit e partive kryesore politike, kryeministri Edi Rama, lideri i opozitës Lulzim Basha dhe ish kreu i partisë së Lëvizjes Socialiste për Integrimin, tani president, Ilir Meta, shpenzuan rreth 1 milion euro për lobimin në SHBA për të rritur prestigjin e tyre në administratën Trump”.
Ky është i vetmi konstatim i KAS lidhur me lobimet e partive, pa analizuar më gjatë se kush nga këta politikanë apo parti ka shpenzuar më shumë para për lobim në SHBA.
Krahasimi që KAS nuk e ka marrë mundimin ta bëjë, është fare i thjeshtë nëse i referohesh të dhënave online në faqen e Departamentit Amerikan të Drejtësisë ku pasqyrohen kontratat e lobimit dhe vlerat e tyre, si më poshtë:
Partia Demokratike:
-Kontratë më “Stonington Strategies”, vlera totale 675.000 dollarë.
-Kontratë me “Barnes and Thornburg LLP”, vlera totale 300.000 dollarë.
-Kontratë me “Barons Public Affairs LLC”, vlera totale 45.000 dollarë.
-Kontratë me “Sonoran Policy Group”, vlera 40.000 dollarë.
Vlera totale e këtyre kontratave të PD arrin në 1.060.000 $ (1 milion e 60 mijë dollarë)
Sa i takon LSI, vetëm gjatë vitit 2016, LSI ka bërë pagesa në vlerë 267,804 USD për kompaninë Global Security and Innovative Strategies, GSIS.
Në Janar 2017 LSI ka paguar dhe kompaninë e lobimit “McKeon Group” me 15 mijë USD.
Partia Socialiste nënshkroi një kontratë që niste në 1 prill të vitit 2017 sipas së cilës do t’i paguante Ballard Partners 20 mijë dollarë në muaj. Pagesat nga PS u kryen për 4 muaj, që do të thotë se ka paguar më pak se 10 % të shumës së shpenzuar nga PD.
Faturat e çdo partie tregojnë se është partia demokratike ajo që mban rekordin e parave të paguara për lobim në SHBA. E për rrjedhojë, konstatimi i fondacionit të lidhur me Partinë Demokratike është i pavërtetë.
Fshehja e shifrës së majme që PD pagoi për lobim nga ana e “Konrad Adenauer” tregon përpjekjen për të fshehur shpenzimet e vërteta të krye-opozitarit më të pasur të Ballkanit pas idesë se “në Shqipëri, të gjithë janë njësoj”!
