Komisioni për Sigurinë Kombëtare miratoi dje në parim projektligjin “Për disa ndryshime dhe shtesa në ligjin nr.8331, datë 21.4.1998 “Për ekzekutimin e vendimeve penale”, i ndryshuar. Projektligji në fjalë vjen në kuadër të paketës së reformës në drejtësi, ndryshim i cili do t’i japë shtysë implementimit sa më parë të ligjeve të mbetura të kësaj pakete. Të ftuar në komision për të prezantuar ndryshimet në këtë ligj ishte zëvendëskryetarja e Kuvendit të Shqipërisë, Vasilika Hysi, Drejtori i Shërbimit të Provës, Ëngjëll Hysi dhe Drejtori Juridik i Drejtorisë së Përgjithshme të Burgjeve, Erjon Semani. Fillimisht, kryetarja e komisionit, Ermonela Felaj tha se projekti është pjesë e paketës së ligjeve të reformës në drejtësi.
Sipas saj, ligji nuk lidhet vetëm me punën e Shërbimit të Provës, por edhe me punë e organit të prokurorisë. Më pas fjalën e mori zonja Hysi, e cila u shpreh se kjo nismë është një produkt i ekspertëve të nivelit të lartë. “Ky ligj ishte paketë me ligjin për shërbimin e provës që nuk ishte pjesë e punës së grupit të ekspertëve të nivelit të lartë të reformës në drejtësi, por ishte nismë e qeverisë, por njëkohësisht edhe me projektligjin “Për shtesa dhe ndryshime në ligjin për të drejtat dhe trajtimin e personave të paraburgosur dhe të dënuar”, i cili ende nuk ka ardhur për diskutim.
Të tre projektligjet kanë ndikim dhe janë të lidhur organikisht me njëri-tjetrin”, deklaroi ajo. Më tej, në analizën e bërë nga zonja Hysi u parashtruan disa nga problematikat që janë konstatuar në praktikë. “Së pari, ka të bëjë me njoftimin e të dënuarve, të cilët janë hetuar në gjendje të lirë dhe duhet bërë ekzekutimi vullnetar i tyre. Praktika ka hasur një sërë problemesh në paraqitjen e tyre për të filluar vuajtjen e dënimit. Së dyti, ka të bëjë me personat që kanë mase arresti në shtëpi. Vështirësia që haset në mbikëqyrjen e personave, për mënyrën e kontrollit të tyre, me qëllim që ne fund të ketë një politikë penale të aplikuar nga gjykata sa më të drejtë”, thuhet në gjetjet e Hysit
. Ndërsa, Drejtori i Shërbimit të Provës, Ëngjëll Hysi i paraqiti komisionit disa amendime. Gjithashtu dhe Drejtor Juridik i Drejtorisë së Përgjithshme të Burgjeve, Erjon Semani theksoi se të gjitha ndryshimet e bëra ndikojnë në mbarëvajtjen e punës së institucionit që përfaqëson. Në përfundim anëtarët e komisionit vlerësuan punën e kryer nga zonja Hysi, e cila ka ushtruar të drejtën e saj kushtetuese dhe më pas e shqyrtuan nen për nen ligjin në fjalë dhe e miratuan atë në parim.
