Të pakta janë detajet në lidhje me ngjarjen, ndërsa policia, sikurse prokuroria, janë treguar të kursyer në dhënien e informacionit.
Grupi hetimor i ngritur nga prokuroria drejtohet nga Elisabeta Imeraj ndërsa prokurorë janë Kreshnik Ajazi dhe Artan Lulo.
Imeraj është cilësuar si gruaja që “trembi politikën”, pas hetimit të çështjes Tahiri dhe kërkesës për heqjen e mandatit të tij.
Ajo gjithashtu ka hetuar çështjen Shullazi dhe është e vetmja prokurore femër tek Krimet e Rënda.
Deri më tani mësohet se janë marrë në pyetje të pranishmit, përfshirë edhe këngëtaren Elvana Gjata.
Mirëpo, ngjarja e ndodhur rreth orës 22:00 të mbrëmjes së djeshme me siguri ka qenë një moment sikleti për të gjithë zyrtarët shqiptarë, duke marrë parasysh se rreth 200 metra larg vendit ku u shkrehën armët, në Hotel Rogner, janë akomoduar drejtorë dhe zyrtarë të lartë të policive të Ballkanit, Europol dhe DEA-s.
Ata ndodhen në Tiranë për një aktivitet të rëndësishëm që mbahet në Pallatin e Kongreseve në Tiranë.
Elvana Gjata është këngëtarja e famshme e pranishme në masakrën e ndodhur mbrëmjen e djeshme në një prej lokaleve të ish-Bllokut, ndërsa paraprakisht mësohet se ka qenë i dashuri i saj, një biznesmen i fuqishëm, ai që ka shtirë ndaj viktimave.
