Jari është hutuar pak nga këto arrestimet e fundit dhe po përpiqet me shumë sforcim të kuptojë se çfarë po ndodh realisht.
Lajmet e portaleve ia shtojnë më shumë paqartësinë, ndërsa debatet në televizion nuk i ndjek dot deri në fund, se e merr gjumi nga ora 10 e mbrëmjes, kur ato janë në mes.
Por si gjithmonë, në të tilla raste Jari e gjen shpëtimin tek Doktori.
Ndaj edhe sot, fiks në orarin e fiqve, pasi i lexoi nga tre herë gazetat dhe portalet, që t’i kuptonte më mirë, ai mblodhi forcat dhe shkroi mesazhin e mëposhtëm:
“Të nderuar demokratë, Jari ju sqaron!
Me arrestimet e fundit të shumë trafikantëve dhe zyrtarëve, Qeveria e krimit do të na hedhë hi syve, por ne nuk jemi syleshë.
Ata janë duke futur brenda vetëm banda të opozitës, ose kriminelë neutral, dhe nuk i po prekin bandat e veta.
Për t’i dalluar se cilat janë bandat tona, shikoni ato që nuk i përmend kurrë Doktori.
Po i zuri me gojë emrat e banditëve ai, ta dini që janë të Edi Ramës dhe të PS-së.
Mbrëmë deshën ta kapin në gabim tek Eni Vasili për atë te basteve që u plagos te Blloku, por Doktori nuk gjendet asnjëherë pa argument.
E dëgjuat vetë sa bukur e kaloi.
-Kisha hallin e Elvana Gjatës, tha, këngëtares së nderuar, prandaj nuk fola, ndërkohë që vazhdonte të shante të dashurin e saj, që e quante mik të Sajmir Tahirit.
Sepse e gjithë Shqipëria e njeh Doktorin, që ai kurrë nuk flet për femra dhe asnjëherë nuk i futet tjetrit tek çështjet private dhe intime, sepse është malësor me virtyte të larta.
Nga ana tjetër, Doktori ka dhënë prova se ka respekt për vajzat blogere, që i fitojnë lekët me aktivitetin e tyre, pa pasur nevojë për partnerët e vet, sado lekë të kenë këta të fundit.
Ndaj që të mos hutoheni si unë gjatë këtyre ditëve, mos u lodhni të kuptoni vetë ndonjë gjë nga këto goditjet e bandave, por dëgjoni çfarë thotë Doktori me gojën e vet, ose përmes qytetarit digjital, se e njëjta gjë është.
Nëse nuk arrestohet kreu i Meduzës së krimit, Edi Rama, dhe kryetrafikanti i të gjitha trafiqeve në Shqipëri, Taulant Balla, ta dini se bëhet fjala ose për banda të opozitës, ose për kriminelë neutralë.
Për çdo paqartësi, ndiqni me vëmendje reagimet e mëtejshme të Doktorit, sepse vetëm ai nuk gabon kurrë.
E para, sepse ka informacion, por më e rëndësishmja, se nuk ngatërron asnjëherë librin e shtëpisë sonë me atë të kundërshtarit.
Për të qenë brenda, mos i dëgjoni ca ditë deklaratat e Lulit, sepse mund të bëjë ndonjë gabim pa dashje, dhe mund të ngatërroheni.
Sepse Luli, jo vetëm nuk ka aftësinë e Doktorit për këto punë, por mund të bëjë ndonjë gafë me këto lidhjet familjare, sepse ai familje quan vjehrrin, vjehrrën dhe kunatin.
Por shumica e shqiptarëve e mendojnë ende si Doktori këtë punë, që familje janë gruaja, djali dhe vajza.
E derisa t’i bindim njerëzit të pranojnë këtë standartin e Lulit, Edi Rama mund të na kalojë edhe disa herë të tjera mbi trupat tanë, ashtu si Fatmir Xhafaj kur u bë ministër i Brendshëm.
I juaji, Jari!”
