Dorëheqja e befasishme e ministrit të Brendshëm, Fatmir Xhafaj, pritet t’i hapë rrugë arrestimit të një prej njerëzve më të rrezikshëm dhe më të pushtetushëm të botës së krimit, ‘Eskobarit të Ballkanit’, Klement Balilit. Ky i fundit ka lidhje të forta me politikën, fijet e së cilës po këputen dita-ditës, për t’i hapur rrugën arrestimit të tij.
Klement Balili është i lidhur ngushtë me eksponentë të lartë të partisë së themeluar nga Ilir Meta, LSI. Kjo ka qenë arsyeja, që biznesmeni dhe ‘kapoja’ i trafikut ndërkombëtar të drogës të shpëtojë nga ‘dora e hekurt’ e drejtësisë së kalbur, e cila deri më tani është kontrolluar direkt nga politika e korruptuar.
Kohët e fundit, teksa drejtësia e re ka filluar të depërtojë thellë në kupolën korruptive dhe të godasë cilindo që i del përpara, në ‘listën e zezë’ ishte edhe Balili. Për të shpëtuar ‘kokën’ e tij me çdo kusht, LSI me në krye Monika Kryemadhin, filluan t’i lëpihen ministrit të Brendshëm, Fatmir Xhafaj. Monika harroi krejt papritur përplasjet dhe ‘luftën’ e ashpër mes Xhafajt dhe Ilir Metës, dhe filloi të thurte elozhe për ministrin e Brendshëm.
Në fakt, ‘lepuri flinte diku tjetër’! Shkaku i këtij afrimiteti dyshohet se ishte çështja e Klement Balilit. Ministri Xhafaj, i cili po lakmonte së tepërmi postin e kryeministrit, duket se kishte arritur nëndheshëm një pakt me Metën dhe Kryemadhin për të mbrojtur Klement Balilin dhe për ta mbajtur atë larg drejtësisë së re, ku si shpërblim do të merrte mbështetjen e tyre politike kundër Edi Ramës.
Dyshimet për një pakt të fshehtë Monika-Meta-Xhafaj shtohen edhe më shumë nga heshtja e kombshme e kryetares së LSI, e cila deri para pak kohësh, kërkonte shkarkimin e Xhafajt nga detyra, por sot nuk kemi ende asnjë reagim prej saj./Pamfleti
