Ilir Meta është sot në limitin e kohës për dekretimin e propozimit të Edi Ramës për ministër të Brendshmëm. Emri i Sandër Lleshit, presidentit i është çuar që të shtunën e kaluar, por shkarkimi dhe emërimi, procedurë kushtetuese që duhet dekretuar nga presidenti, nuk ka ndodhur ende.
Ministria e Mbrojtjes, Shërbimi Informativ i Ushtrisë, Shërbimi Informativ Shtetëror, gjykatat dhe prokuroria po i kthejnë përgjigjet e nevojshme President Metës. Po ashtu Presidenca është konsultuar edhe me juristë jashtë selisë dhe ata kanë shpjeguar se presidenti ka afat deri në mesnatën e kësaj të shtune.
“Presidenti ka për detyrë të ushtrojë të gjithë përgjegjësitë e tij kushtetuese për të krijuar bindje të plotë për çdo propozim që i bëhet për dekretim. Presidenti nuk mund të hedhë firmën për dekrete formale, sepse do të ishte papërgjegjshmëri. Aq më tepër për një detyrë të tillë, e cila në momentin aktual kërkon akoma edhe më shumë përgjegjësi dhe vëmendje. Më duket se ua kam thënë të qartë që kam bërë punën time institucionale. Kam bërë përpjekjet e mia, dhe kam qenë mjaft bashkëpunues me të gjithë institucionet dhe personat që duhet të jenë të interesuar njëkohësisht për këtë çështje, ndaj edhe unë di t’i marr përgjegjësitë e mia me përgjegjshmëri të plotë, i pa ndikuar nga askush, as nga orët tuaja, as nga sekondat tuaja dhe askujt tjetër”, deklaroi mbrëmë Ilir Meta, mesazh që u lexua si një kërcënim ndaj Edi Ramës.
Dikur aleatë, tashmë Edi Rama dhe Ilir Meta i kanë ngrirë marrëdhëniet. Mes tyre qëndrojnë shumë çështje pezull, duke filluar nga dekretimi i Sandër Lleshit, që do të konkretizohet me PO ose JO për punë orësh, emërimi i kreut të ri të SHISH, si dhe dhënia e plotfuqishmërisë për bisedimet me Greqinë për çështjen e detit.
