Këtë të diel në orën 20:00 ishte premiera shqiptare e filmit “Delegacioni”, të Bujar Alimanit fitues i Grand Prix në Varshavë.
Shfaqja bëhej në kuadër të Festivalit Ndërkombëtar të Filmit (TIFF). Ndonëse gazetarët patën konfirmuar pjesëmarrjen përmes zëdhënëses siç ndodh në çdo vit me TIFF, gazetarët nuk u lanë të hyjnë.
Arsyetimi ishte mungesa e biletave megjithatë edhe vetë kryeministri hyri me biletën e Kryetarit të Qendrës së Kinematografisë, Ilir Butka.
Nuk lanë të hynin brenda as Ndriçim Xhepën, aktor i filmit “Delegacioni”. Ai doli jashtë dhe u desh ardhja e Agron Domit, drejtor i festivalit dhe Kryetarit të Qendrës Ilir Butka që ai të futej, siç shihet në videon që po publikojmë.
Teksa Ndriçim Xhepa shprehej se nuk futem se s’kam biletë, Agron Domi ju drejtua se do i jepte të veten, më pas ndërhynë edhe përfaqësues të kinemasë. Debati zgjati disa minuta.
Jashtë mbetën familjarë të ekipit të filmit dhe gazetarët, duke qenë se në premiera si kjo janë ftesat dhe komunikimet me organizatorët e festivalit që vendosin për hyrjet.
E gjendur para kësaj situate të papritur pasi kishte komunikuar dhe marrë konfirmime prej dy ditësh me gazetarët, zëdhënësja e Festivalit, Genta Ramadani kërkoi ndjesë.
