Idlir Karkini, biznesmeni i përfshirë në skandalin e vjedhjes së tokave në Rrogozhinë, ka risjellë akuzat politike në vend.
Top Channel në një kronikë të transmetuar këtë të mërkurë, thotë se ai është i përfshirë në të ashtuquajturin skandali i radarëve të ushtrisë.
“Në dhjetor të vitit 2013, përmes një tenderi sekret Ministria e Mbrojtjes i dha kompanisë “Idea Tel” të drejtën për të menaxhuar sistemin e integruar të radarëve detarë duke ja hequr atë gjigantit amerikan “Lockheed Martin”.
Por në dhjetor të vitit 2015, tenderi u auditua nga KLSH, i cili gjeti shkelje. Sipas KLSH e gjithë procedura ishte zhvilluar në kundërshtim me ligjin për të larguar “Locked Martin” dhe për të shpallur fituese kompaninë “Idea tel”, që në atë kohë kishte si aktivitet të saj vetëm një dyqan celularësh.
Sipas KLSH, Ministria e Mbrojtjes shpalli fituese kompaninë “Idea Tel”, e cila jo vetëm që nuk kishte ekspertizën e nevojshme për të menaxhuar vëzhgimin e hapësirës detare, por kishte ofruar edhe një çmim 4 herë më të lartë se sa “Lockheed Martin””, thotë Top Channel.
Por, e vërteta është krejt ndryshe.
Siç vërtetohet edhe nga faksimilet, “Idea Tel” e firmosi kontratën që në vitin 2011, me qeverinë e Sali Berishës.
Pra, kontrata ishte firmosur para se drejtimin e Ministrisë së Mbrojtjes, ta merrte Mimi Kodheli.
Madje partneri i kompanisë “Lockheed Martin”, “GEM elettronica”, i ka dërguar atëhere dhe një protestë zyrtare kryeministrit Sali Berisha dhe ministrit të Mbrojtjes, Arben Imami.
Në letrën protestë, prodhuesit e radarëve dhe partnerit të “LM”, shprehen se askush s’ka të drejtë të ndërhyjë në teknologjinë e tij, pa autorizimin e trajnimin paraprak të tyre.
Për më tepër, biznesmeni në fjalë, Idlir Karkini, është denoncuar nga vetë Kodheli për vjedhjen e pronave në Kavajë.
