Ai sapo ka mbushur 74 vjeç dhe prej 9 ditësh del në rrugët dhe sheshet kryesore të Tiranës për të protestuar. Destan Dangëllia është ndoshta studenti më i veçantë në protestën studentore që ka shpërthyer në Tiranë.
“Unë jam 74 vjeç dhe vazhdoj shkollën për Inxhinieri Mjedisi në Universitetin Bujqësor në Kazmës.
E kam filluar në vitin 2005, por nuk kam pasur mundësi që ta përfundoj në kohë, pasi më ka mbetur vetëm një provim pa marrë,” shprehet Destan Dangëllia për Gazeta Si.
Ai nuk është moshatar me studentët e tjerë, por në protestë del për të njëjtën kauzë, një arsim më cilësor dhe përmbushjen e 8 kërkesave të bëra publike.
“Unë jam nga Devolli dhe tani duhet që të jap edhe provimin e mbartur që më ka mbetur, pasi këto vite nuk kam pasur mundësinë që të paguaj tarifën çdo vit.
Unë e kam filluar shkollën me një mision, që t’u përcjell të gjithë të rinjve mesazhin se arsimi është gjëja më e çmuar.
Kur mësova për këtë protestë të të rinjve, nuk mund të rrija dhe i jam bashkuar që nga dita e parë.”
Dëshira për arsimin te ky zotëri është e pakufishme, pasi e ka një burim të vjetër, që nga rinia e tij e hershme.
Ai ka arritur ta realizojë ëndrrën e tij për shkollim, pasi gjatë regjimit komunist kjo e drejtë i ishte mohuar.
“Unë jam kushëri i Sami Dangëllisë që gjithë jetën e tij e kaloi në internim.
Edhe unë disa vite i kam kaluar në burgjet e sistemit.
Datëlindjen e 34-ët e kam festuar në burgjet e komunizmit dhe dua t’ju them të gjithë këtyre të rinjve që mos të lejojnë një rikthim të atij lloj regjimi.”
Destan Dangëllia si në të gjithë ditët, edhe këtë të enjte mbajti fjalën në podiumin e improvizuar para parlamentit, duke i motivuar akoma dhe më shumë studentët me historinë e tij.
