Deri në pranverë pritet që të jetë ngritur Prokuroria e Posaçme Antikorrupsion bashkë me gjykatën. Pra kjo do të thotë se nëse prokuroria nuk pushon hetimet, dosja e CEZ me patjetër do të kalojë te SPAK. Nëse prokurorët marrin dhe 3 muaj kohë në janar, atëherë sipas ligjit dosjet e aferave të korrupsionit do transferohen te SPAK. Por dhe nëse nis gjykimi, sërish do kalojë aty pasi kemi të bëjmë me ish-ministra e ish-kryeministra, që janë kompetencë e SPAK. Pra sinjalet janë se dosjet e mëdha do merren në dorë nga ndërkombëtarët. Prokuroria ka thelluar hetimet sa i takon aferës së CEZ. Teksa dështoi me gjetjen e Nuel Kalajt, sekseri që lidhi çekët me qeverinë “Berisha”, Prokuroria e Tiranës ka kërkuar ndihmën e Çekisë për të hedhur dritë mbi privatizimin e ish-OSSH.
Kryetarja e Prokurorisë së Tiranës Elisabeta Imeraj, në përgjigjen e saj për “Sot”ka bërë të ditur se ditët e fundit sapo ka mbërritur një dosje nga Çekia.
“Në përgjigje të kërkesës suaj, me anë të së cilës kërkoni informacion lidhur me çështjen CEZ, ju bëjmë me dije se: Ka mbërritur letër-porosia nga autoritetet e drejtësisë së Republikës Çeke dhe çështja është ende në hetim”, thuhet në përgjigjen e prokurorisë.
Pak kohë më parë nisi një hetim dhe në Çeki për aferën e CEZ dhe përveç të gjitha provave që kanë pasur në zotërim prokurorët në Pragë, ata kanë sjellë në Tiranë dhe dëshmitë që kanë dhënë Josef Hejsek dhe Jan Ivan, dy ish drejtues të CEZ. Sipas burimeve, ata në dëshmitë e tyre kanë folur për lidhjet me Berishën, djalin e tij, por dhe me ish-ministrin Genc Ruli. Edhe pse ata në shumë raste janë munduar që të deklarojnë se nuk mbajnë mend gjë, mësohet se janë pyetur për të gjitha veprimet e dyshimta.
Prokurorët e çështjes në Tiranë kanë marrë si regjistrimet, ashtu dhe transkriptimet e dëshmive dhe të gjitha po shqyrtohen me detaje për të kuptuar nëse kemi të bëjmë apo jo me shkelje të ligjit. Një burim i sigurt i tha gazetës se janë grumbulluar një sërë provash të rëndësishme kundër të akuzuarve dhe në fillim të vitit 2019 pritet që prokurori të vendosë për dërgimin e dosjes në gjykatë ose të kërkojë më tepër kohë.
Provat që ka prokuroria
Në paditë që janë bërë në prokurori, janë dorëzuar disa prova të rëndësishme.Së pari janë 5 e-maile mes Nuel Kalajt dhe çekëve, ku flitet për aferën e CEZ. Më konkretisht: E-mail nga Nuel Kalaj drejtuar Martin Roman, me subjekt “OSSH Developments”, datë 07.09.2009; E-mail i Nuel Kalaj drejtuar Tomas Pleskac, me subjekt “Re: Kosova”, datë 11.05.2010; E-mail i Nuel Kalaj drejtuar Josef Hejsek, me subjekt “15.05.2010 Report”; E-mail i Josef Hejsek drejtuar Tomas Pleskac, me subjekt “Albanie-priprava jednani s PM”, datë 28.01.2010; E-mail i Josef Hejsek drejtuar Nuel Kalaj, me subjekt “Ëorld Bank- Notice of Event-do be delivered”, datë 17.11.2011. Po ashtu janë të gjitha vendimet e qeverisë, udhëzimet dhe urdhrat e lëshuara nga Ministria e Energjisë dhe nga ERE. Gjithashtu janë dhe të dhënat që vetë prokuroria ka gjetur nga verifikimi i llogarive bankare të Nuel Klajat. Janë mbi 50 prova që janë dorëzuar në prokurori nga paditësit, por që për prokurorinë janë të pamjaftueshme. Po ashtu janë dhe dëshmitë që kanë dhënë disa prej të akuzuarve. Megjithatë mbetet të shihet nëse viti 2019 do të sjellë një erë të re në luftën ndaj korrupsioni
