Pas denoncimeve të njëpasnjëshme të ish zv. Ministrit të Arsimit, Taulant Muka që mbajti vetëm një javë detyrën u rikthyen në vëmendje emrave publikë, nga politika apo jeta akademike, për të parë vërtetësinë e shkollimit të tyre.
Doktoratura është kthyer më shumë në mode, sesa një titull i rëndësishëm për jetën akademike, plagjiaturë, e blerë. Në emisionin “Opinion” gazetari Blendi Fevziu solli shembullin e një politikani shqiptar pa diplomë dhe ndër më të zgjuarit.
Ai nuk jeton më. Është i ndjeri Sabri Godo, ish-kreu i republikanëve, i cilësuar ndryshe dhe si “plaku i urtë” gjatë kohës që bëri protagonistin në politikën shqiptare. Kurrë nuk nxorri fjalë fyese apo shprehi të rëndomta inatçore për të kundërtin e tij në politikë. Puna më e madhe e tij qe hartimi i Kushtetutës së vitit 1998. I dalë malit që në moshë të re si partizan, ai në vitet e çlirimit pati atë rrjedhe jete që nuk ia mundësoi shkollimin.Madje krahas një filli jete intelektuale si shkrimtar, bëri dhe punë të rëndomta që sistemi ia diktoi si një formë ndëshkimi.
“Në Parlamentin e dytë kishte dy pa diploma. Ridvan Peshkëpia dhe i dyti ishte pa diplomë, si Sabri Godo që ishte një politikan i zoti. Një politikani nuk i duhet me se s’bën”, tha Fevziu.
Edhe një prej penave më të vyera të letra shqipe, Kim Mehmeti është pa diplomë. Shqiptar i Maqedonisë, fjala e tij është sistem reference për mbarë hapësirat shqiptare.
Këto vlejnë për të gjithë ata që nuk kanë kuptuar : shkolla është grini (mprehësja) e mendjes, por jo vetë mendja.
