Një grup i organizuar kriminal ndërkombëtar u ka marrë jetën tre personave, mes të cilëve atë të ish-presidentit të bankës “Credins”, Artan Santo, një zhvillim i papritur ky, që pritet të zbardhet në të ardhmen e afërt nga organet përkatëse. Kjo bëhet e ditur në një dokument dërguar disa përfaqësive diplomatike në Tiranë.
Sipas njoftimit dërguar avokatit Mirjan Kapo, të mërkurën, më 30 janar 2019, ora 11:00, në gjykatën e Tiranës zhvillohet një gjyq i rrallë. Një jurist me përvojë të gjatë, si avokati Kapo, kundërshton aktet e prokurorisë lidhur me një procedim penal, që u pushua me vendim të nënshkruar nga prokurori Ylli Bashaj, konfirmuar nga drejtuesja e prokurorisë pranë gjykatës së shkallës së parë Tiranë, Elizabeta Imeraj.
I mbetet gjyqtares Oltiona Goxha të vendosë nëse do të vazhdojnë hetimet për akuzat e avokatit Kapo. Ky i fundit, nga ana e tij, ka informuar ambasadat e SHBA-së, BE-së, Gjermanisë, Italisë dhe Spanjës, duke u rekomanduar të dërgojnë përfaqësues të tyre për të qenë të pranishëm. Kapoja i garanton se në këtë seancë do të paraqiten “prova të rëndësishme që vërtetojnë veprimtarinë e një grupi të organizuar kriminal ndërkombëtar, ku janë përfshirë edhe qytetarë të vendeve” që përfaqësojnë ambasadat e ftuara.
Bie në sy deklarimi i bujshëm se në çështjen e arkivuar nga prokurori Bashaj, “janë denoncuar edhe persona të rëndësishëm politikë si Presidenti i Republikës Ilir Meta, ish-Prokurori i Përgjithshëm Adriatik Llalla etj.”. Kapoja informon ndërkombëtarët se “janë të shumtë faktorët dhe aktorët politikë që pengojnë hetimin e kësaj çështjeje, që deri më sot ka marrë jetën e 3 personave, si të ish-drejtorit të bankës “Credins” etj”. Për këtë qëllim, avokati Kapo i ka bashkëngjitur informacionit 8 dokumente, “të cilat sqarojnë për rrezikshmërinë e grupit kriminal”.
Më herët, më 23 nëntor 2018, kallëzuesi Mirjan Kapo i ka dërguar një kërkesë Prokurorit Ylli Bashaj, të cilit i vë në dukje se nga ana e tij duhet të kërkohet nga banka “Credins” raporti i xhiros së llogarisë së kompanisë “Global Trade Creaton Limited”, ku vërtetohet vjedhje e kryer nga D. Shenaj në bashkëpunim. Këtë e konfirmon i dëmtuari Mair Selimi, shtetas kroat me origjinë shqiptare në një e-mail dërguar Kapos:
“5.11.2017. Z. Kapo… ju lutem të lypni zyrtarisht nga Banka CREDINS që t’ju japë raportin e xhiros së kontos GLOBAL TRADE CREATION LIMITED, ku shihen krimet që ka bërë Dashnor Shena, pikërisht blerjen e 2 (dy) AUDI 7, i cili në bashkëpunim me shitësin kanë kthyer vlerën 170,000.00 euro mbrapsht në konton tek GLOBAL TRADE CREATION LIMITED dhe mbas disa minutash të njëjtat para janë transferuar tek kontoja e Dashnor Shenës. Kjo është bërë me bashkëpunim të punëtorit [punonjësit] të Bankës Credins dhe Dashnor Shenës pa pëlqimin tim… Me respekt Mair Selimi”.
Për këtë fakt që ka ndodhur në vitin 2010, është shkaktuar furtunë në bankën “Credins” nga ish-drejtori Artan Santo, i ekzekutuar në mënyrë misterioze në vitin 2014. Për këtë pistë duhej hetuar nga prokuroria, ankohet në kallëzimin e vet Kapoja, që mendon se i njëjti grup kriminal e ka kërcënuar me vdekje në vitin 2017./Ekskluzive.al
