Nuk ka më asnjë dyshim se ka nisur një luftë e ftohtë mes Presidentit Ilir Meta dhe kryeministrit Edi Rama. Kur u betua qeveria “Rama 2” u duk se marrëdhëniet mes Ramës dhe Metës nuk ishin aq të ftohta, por pas muajit nëntor duket se ka nisur lufta mes tyre. Rasti që e tregon më së miri një gjë të tillë është mungesa e dekretit të drejtorit të ri të Shërbimit Informativ Shtetëror. Qysh më 30 tetor të vitit 2017 në tavolinën e Presidentit Meta, kreu i qeverisë ka dërgua një shkresë, ku kërkon që pasuesi i Visho Ajazi Likës të jetë Helidon Bendo. Që prej asaj date, kanë kaluar 4 muaj dhe kreu i shtetit nuk ka marrë ende asnjë vendim. Nuk dihet arsyeja se përse Meta nuk e ka dekretuar apo heziton të dekretojë kandidaturën e Bendos, por një veprim i tillë lë të nënkuptohet se është një provë force dhe një kundërshtim i hapur që Presidenti i bën qeverisë. Madje, ky karshillëk i Metës ndaj Ramës tregon qartë se pavarësisht ndarjes së pushteteve, përplasja dhe lufta mes institucionit të Presidencës dhe Kryeministrisë rritet nga dita në ditë.
Një tjetër provë që dëshmon qartë se ka një luftë të ftohtë mes Presidentit Ilir Meta dhe kryeministrit Edi Rama është marrëveshja me Greqinë sa i takon çështjes së detit. Pak ditë më parë, ministri i Jashtëm, Ditmir Bushati i kërkoi plotfuqishmëri Presidentit Ilir Meta për nisjen e bisedimeve teknike me Greqinë, ku çështja e detit është dhe pika më e nxehtë mes të dy vende. Por një javë më pas, përmes një prononcimi për mediat, Meta njoftoi se i ka kthyer pas Ministrisë së Jashtme kërkesën për autorizimin për dhënien plotfuqisë për grupin që do të negociojë me Greqinë marrëveshjen e re për detin. Presidenti shpjegoi se sipas tij, kërkesa nuk ishte paraqitur në respekt të Kushtetutës dhe përcaktimeve të bëra nga Gjykata Kushtetuese për këtë çështje. Ndërsa më pas Ministria e Jashtme reagoi duke shpjeguar se letrës së Presidentit do t’i përgjigjet në mënyrë institucionale. Dhe kështu ndodhi. Ministria e Jashtme i dërgoi një shkresë të dytë Metës, me anë të së cilës i kërkoi sërish plotfuqi. Madje, në letër Bushati kishte shënuar edhe sqarimet e kërkuara nga Presidenti. Megjithatë, pavarësisht detajeve të shkruara në letrën e dytë, Meta i ktheu sërish Bushatit kërkesën për autorizim për negociatat me Greqinë. Pra përmes këtyre veprimeve dhe ecejakeve, tregohet qartë se ka shpërthyer një luftë mes Qeverisë dhe Presidencës.
Presidenti bojkoton ligjet e qeverisë
Mirëpo nuk ndalet me kaq, pasi lufta e ftohët mes Presidentit Ilir Meta dhe kryeministrit Edi Rama është spostuar edhe në kuadrin ligjor. Gazeta ka bërë një kërkim dhe rezultojnë se janë 8 ligje që janë miratuar nga Kuvendi gjatë këtyre dy muajve, ndërkohë që kreu i shtetit duket se i ka bojkotuar ato. Nga vëzhgimi i gazetës rezulton se janë dy ligje që Presidenti Meta i ka kaluar në heshtje, është ligji për marrëveshjen e ndërtimit të Aeroportit të Vlorës dhe ligji për hartimin e një studimi mbi investimet në infrastrukturë. Po ashtu nga kërkimi i gazetës rezulton se janë tre ligje që Meta i ka dekretuara por nuk i ka papublikuara te faqja zyrtare e Presidencës, siç është ligji për festat zyrtare dhe ditët përkujtimore. Ndërkohë nga kërkimi rezulton se janë plot tre ligje të pa dekretuara nga Presidenti, siç është ai për ratifikimin e traktatit që themelon komunitetin e transportit, si dhe ligjet për burimet ujore dhe energjinë. Megjithatë, mbetet për tu parë në ditët në vijim se si do të shkojë kjo përplasje mes Presidencës dhe Kryeministrisë./ Rigels Seliman
