Rëndohen pozitat e dy ish-ministrave të Lëvizjes Socialiste për Integrim, Ylli Manjani dhe Petrit Vasili sa i takon skandalit të shpërthyer pak ditë më parë në Ministrinë e Drejtësisë. Prokuroria ka vendosur nën hetim 12 ish-zyrtarë të kësaj ministrie për abuzime me tenderat, por nuk rezultojnë shumë të pastër as dy ish-ministrat e LSI.
Gazeta ka nxjerrë të tjera detaje nga auditi i Ministrisë së Financave në Ministrinë e Drejtësisë, ku zbulohen shkeljet e Manjanit dhe Vasilit gjatë kohës që ata ishin në krye të ministrisë. Më konkretisht, për Ylli Manjanin auditi ka gjetur probleme në tenderin “Rikonceptimi, përmirësim dhe mirëmbajtje e sistemit të menaxhimit elektronik të përmbarimit ALBIS”. Urdhri për këtë tender është lëshuar në vitin 2016, kohë kur Ministria e Drejtësisë ishte nën drejtimin e Manjanit sepse ai ka mbajtur postin e ministrit nga 2015 deri në janar të 2017.
Ndërsa për Petrit Vasilin me probleme ka rezultuar tenderi “Sistemi i monitorimit me kamera për burgun Lezhë e Fushë Krujë”. Sipas auditit të Ministrisë së Financave, urdhrat për këto dy tendera janë në kundërshtim me ligjin. “Urdhri i Ministrit të Drejtësisë nr.7260/6 datë 05.12.2016 “Për zhvillimin e procedurës së prokurimit me mjete elektronike me objekt “Rikonceptim, përmirësim dhe mirëmbajtje e sistemit të menaxhimit elektronik të çështjeve të përmbarimit ALBIS”, është në kundërshtim me VKM nr. 443, datë 16.06.2011 “Për krijimin, regjistrimin, mënyrën e funksionimit, të administrimit e të ndërveprimit dhe për sigurinë e sistemit të menaxhimit elektronik të çështjeve të përmbarimit gjyqësor (ALBIS) dhe Ligjin nr.10325 datë 23.09.2010 “Për bazën e të dhënave shtetërore”.
Nxjerrja e urdhrit për kryerjen e procedurës së prokurimit me objekt “Sistemi i monitorimit me kamera për burgun Lezhë e Fushë Krujë”, nga Ministria e Drejtësisë, me arsyen “mungesë kapacitetesh” në Drejtorinë e Përgjithshme të Burgjeve është në kundërshtim me VKM nr. 914, datë 29.12.2014 “Për miratimin e rregullave të prokurimit publik”, i ndryshuar”, thuhet në raportin e auditit të Ministrisë së Financave të siguruar nga gazeta. Në lidhje me këto shkelje pritet që prokuroria të marrë në pyetje javën tjetër Manjanin, Vasilin, por edhe ish-ministrin teknik të Drejtësisë, Gazmend Bardhi, i cili bëri kallëzim në prokurori për shkeljet e konstatuara nga paraardhësit e tij.
Detajet e auditit
Raporti i auditit të Ministrisë së Financave në Ministrinë e Drejtësisë është shumë i gjatë dhe për këtë arsye sot gazeta po nxjerr vetëm disa detaje nga ai. Në raport një fokus i veçantë u janë kushtuar shkeljeve të gjetura me tenderin “Përmirësimi i sistemit të mbikëqyrjes elektronike në fushën penale.
“Nuk rezulton të jetë ngritur grup pune për hartimin e specifikimeve teknike. Nuk argumentohet dhe nuk dokumentohet përgatitja e tyre, kërkesë ligjore e nenit 12, 22 e LPP –së, i cili parashikon shprehimisht: “Autoriteti kontraktor është përgjegjës për prokurimin e fondeve publike, në përputhje me dispozitat e këtij ligji dhe të akteve nënligjore, të nxjerra në zbatim të tij. Autoriteti kontraktor duhet të mbajë procesverbale dhe dokumentacion të plotë për procedurat e kryera në përcaktimin e fituesit të kontratës.
Inicimi nga ana e titullares së AK i dërgimit të specifikimeve teknike për miratim pranë AKSHIT, është në kapërcim të kompetencave, bazuar në nenin 56 te VKM Nr. 914/2014 “Për miratimin e rregullave të prokurimit publik” i ndryshuar, i cili parashikon: “Titullari i autoritetit kontraktor ose zyrtari i autorizuar prej tij është përgjegjës për ngritjen e grupeve të punës, komisioneve të përfshira në procesin e prokurimit dhe nxjerrjen e urdhrit të prokurimit”, thuhet në raport. /Mimoza Ibra
