Kreu i qeverisë ka zhvilluar sot takimin e radhës në turnin “Bashkia që duam”, duke ndaluar këtë të shtunë pasdite në Përmet.
Nga Përmeti Edi Rama u është drejtuar qytetarëve se në qershor, kjo bashki do t’i kalojë PS, pasi edhe pse nuk i pëlqen të flasë keq për kryetarët e bashkisë që nuk janë të selisë rozë, ai shtoi se ky qytet meriton një drejtues që do t’u kthejë shumëfish besimin votuesve.
Gjithashtu Rama foli edhe për situatën e trazuar politike në të cilën ndodhet vendi.
“Lutem çdo natë para se të fle dhe çdo mëngjes para se të hap sytë, që kjo që na ka ndodhur javën e fundit të mos ju kushtoj njerëzve e punëtoreve të këtij vendi që i janë kushtuar këtij drejtimi, turizmit. Përmeti e ka bazën e të ardhurave të veta turizmin”, deklaroi ai.
“Kam marrë shumë mesazhe nga ju që më thonë mos lësho pe…. Unë nuk kam asnjë pe për të lëshuar, kam një detyrë për të kryer që na e jep kontrata që na e dha shumica. Të qeverisim deri kur të mbarojë mandati ynë dhe deri kur të kemi votat në parlament. Nuk jemi si ata, do ta kryejmë deri në fund”, ishte mesazhi i qartë që kreu i ekzekutivit dha nga Përmeti.
