Keidi Bare është pajisur me pasaportën greke. Mesfushori i Kombëtares Shpresa ka shfrytëzuar lidhjet e tij fisnore për të marrë nënshtetësinë helene, e cila i mundëson më shumë hapësira aktivizimi në çdo kampionat europian.
Për ish-kapitenin e Shpresave, krahas lehtësirave profesionale, mund të ketë pengesa për shkak të shërbimit ushtarak.
Futbollistët shqiptarë regjistrohen ende si ekstrakomunitarë në skuadrat e tyre në kampionatet e rëndësishme europiane. Mirëpo, duke qenë se në secilën ligë, numri i lojtarëve të tillë është shumë i kufizuar, atëherë mundësitë për një karrierë në kampionatet elitare janë fare minimale.
Por, në vendin tonë ka futbollistë që kanë kërkuar të shfrytëzojnë lidhjet e tyre fisnore për t’u pajisur me nënshtetësi të një vendi në Bashkimin Europian, që i bën ata të regjistrohen lehtësisht në skuadra jo si lojtarë ekstrakomunitarë. I tillë është edhe rasti i mesfushorit të Malagas, Keidi Bare.
Mesfushori kuqezi është pajisur me pasaportën helene dhe kjo i mundëson atij lehtësi në karrierën si futbollist profesionist, duke treguar një tjetër rast kur pasaporta shqiptare nuk ofron mundësitë e nevojshme, por… pengesë.
Mirëpo, një dokument i tillë i kërkon Bares që të kryejë edhe shërbimin ushtarak, duke qenë se Greqia e ka ende të detyrueshëm.
Por, në rast se Fiorin Durmishaj disa muaj më parë e kishte të pamundur që të largohej nga Greqia për periudhën e shërbimit ushtarak, për Baren mund të mos ndodhë kjo gjë, për shkak se mesfushori fierak nuk ka zgjedhur të jetojë në shtetin helen. Në të kundërt, edhe për të shërbimi ushtarak do të bëhej i detyruar./Panoramasport
