Fatmir Mediu, i cili i ka shpëtuar me procedurë gjykimit për Gërdecin, duke u veshur me imunitet në qershor të 2009, doli në shesh, ku bëri thirrje për përmbysjen e pushtetit të Edi Ramës.
Pushteti i Edi Ramës duhet përmbysur një orë e më parë për një pafundësi arsyesh, por është pikërisht kjo opozitë e degraduar dhe pa moral, që e mban në këmbë Edi Ramën dhe madje po e çon drejt mandatit të tretë.
Para se të bënte thirrje për rrëzimin Ramës, Fatmir Mediu duhet të paktën të largonte gruan nga ministria e Energjetikës, pasi nëse qeveria është inkriminuar, edhe degët e saj, në këtë rast ministritë janë të inkriminuara.
Bashkëshortja e Mediut, Zhuljeta Mediu, është përgjegjëse sektori në Ministrinë e Energjisë dhe Industrisë
Në të njëjtën situatë është edhe Nard Ndoka. Ky i fundit ka djegur mandatin, me pretendimin se parlamenti dhe qeveria janë produkt i krimit, por nuk largon tre pjesëtarë të familjes nga puna në pushtetin e Ramës.
Gjithashtu, Romeo Gurakuqi, kërkon rrëzimin e qeverisë së krimit, por gruan nuk e tërheq nga puna pranë Institutit të Zhvillimit të Arsimit, pjesë e qeverisjes.
Edhe ish-deputeti i PD, kërkon rrëzimin e këtij pushteti, por gruaja e tij, Teuta Gjunkshi, vazhdon të marrë rrogën në Bashkinë e Tiranës.
Tritan Shehu hidhet përpjetë për rrëzimin e Ramës, por gruaja e tij, Aida Shehu, vazhdon të marrë rrogën në Bashkinë e Tiranës, që drejtohet nga Rama i Vogël, Erion Veliaj.
Edhe deputetja e Monikës, Silva Çaka, kërkon përmbysjen e qeverisë së krimit, ndërsa burri i saj vazhdon të marrë rrogën pranë Zyrës Qendrore të Regjistrimit të Pasurive të Paluajtshme, nëndegë e qeverisë.
Mbi 70 për qind të deputetëve të opozitës, që protestojnë në shesh gjoja në emër të demokracisë, i kanë gratë dhe fëmijët në ministritë dhe drejtoritë më të rëndësishme të pushtetit./Pamfleti
