Nga Dritan Hila
Në një takim të stilit të Lidhjes së Shkrimtarëve qëmotit, Lulzim Basha kishte mbledhur disa artistë dhe po iu shpjegonte se ky pushtet ka degraduar dhe 5-6 oligarkë po e mjelin shtetin dhe ndajnë paratë me Ramën.
Është një shpjegim qesharak.
Gjithsesi artistët e duruan.
Në fakt nëse ka një arsye pse Basha nuk është i besueshëm në revolucionin e dytë të tij, është pikërisht mungesa e sinqeritetit për oligarkët.
Sikur të mos mjaftojë që një pjesë e enturazhit të tij janë ata që u ndeshkuan me votë në 2013-ën; sikur mos mjaftojë mungesa totale e meritokracisë në promovim të figurave të reja që pretendojnë të drejtojnë vendin, duhet shtuar edhe qasja e tij ndaj ekonomisë e oligarkëve.
Kështu kur përmendi shifrën 5-6 oligarkë, ai nuk citoi se cilët ishin. Le të përmendte qoftë edhe një. E ndiejmë të gjithë nëpër xhepa çdo ditë. Është firma që zotëron 70% të tregut të karburanteve shqiptare dhe quhet Kastrati. Është një firmë që nuk e ka krijuar Rama, por është forcuar dhe rritur në kohën e Berishës. Që të kesh një shtrirje të tillë duhet patjetër një përkrahje politike dhe këtë ia siguroi PD.
Rama nuk bëri asgjë tjetër vetëm se e përkrahu dhe futi në paradhomën e tij duke i dhënë më vonë Sheratonin qe ai s’di c’ta beje.
Por kjo nuk do të thotë se humbi lidhjet me Bashën&Berishën. Përndryshe protesta e Kukesit ndaj traut të Kalimashit nuk do të mbetej jetime dhe protestuesit në burg, ku PD lau gojën me një tubim para gjykatës.
Përveç lidhjeve okulte, Basha nuk ofron as edhe një projekt antimonopol. Mund ta bëjë pas ketij shkrimi, por e sigurtë që ka për të qenë vetëm propagandë.
LEXO DHE : Kavajë/ Plagosi 60-vjeçarin në furrën e bukës, arrestohet autori
Monopoli eshtë një sëmundje infantile e kapitalizmit e cila frenon konkurencën dhe rrjedhimisht zhvillimin. Jo më kot BE dhe SHBA kanë komisione antimonopol apo antitrust që ndalojnë mbizotërimin e tregut nga një firmë.
Sot tregun shqiptar të lodrave e zotëron Sajmir Mane. Trailerat e tregëtarëve të tjerë lihen në pritje derisa të shkarkohen dhe shpërndahen ata të Manes. Jo më larg se këtë vit të ri kamionat me lodra të tregëtarëve konkurent të njeriut qe deklaron se është më i pasuri në Shqiperi, pritën derisa Mane shërndau dhe shiti mallin e tij. Asnjë fjalë nuk u dëgjua nga opozita e cila kur ishte në pushtet i çoi tek dera e TEG , unazën e madhe. Është e njëjta që në kohën e Berishës falimentoi gjithë importuesit e mëdhenj të elektroshtëpiakeve duke përzenë edhe një gjigand evropian si Euronics, gje qe e beri Manen tregëtarin dominant të elektroshtëpiakeve me Neptunin si degë e Balfin Group.
Kjo politike zhvillon vetem ata. Shqiperine e le ne vend.
Asnjë denoncim per monopolet, nuk ka bere Basha.
Dhe ky është një argument më shumë që të bind se ai thjesht ka vënë shishen në rradhë që bashkë me zyrën e Ramës të marrë edhe paradhomën e tij , ku e presin me çanta në dorë oligarkët.
Ndaj më shumë sesa revolucion, sulmet që i bën me hunj çdo datë 16 derës së kryeministrisë tregojnë padurimin që të takohet në paradhomën e kryeministrit me Çetin, Zamon e kompani./dritare.net
