Presidenti i Republikës, Ilir Meta ka arritur të zhbllokojë krizën politike që ka ngërthyer prej kohësh vendin duke ulur në tryezë të rrumbullakët kryetarët e partive kryesore politike në Shqipëri.
Meta ka ftuar në dialog kryeministrin Edi Rama, kryetarin e Partisë Demokratike, Lulzim Basha dhe kryetaren e partisë Lëvizja Socialiste për Integrim, Monika Kryemadhi.
Mësohet se që të tre liderët politikë e kanë pranuar ftesën duke vendosur të ulen së bashku për të negociuar mbi zgjidhjen e krizës politike në Shqipëri.
Të gjitha palët kanë pranuar të futen në negociata mes tyre pa asnjë parakusht dhe duke u shprehur të hapur për të arritur një marrëveshje të dobishme për kombin.
Të nderuar lexues!
Sot është 1 prilli, e njohur si dita e gënjeshtrave. Vendosëm që këtë 1 prill të publikojmë këtë lajm tipik 1 prilli jo thjesht për të gënjyer me këtë rast, por sepse mbarë shqiptarët kanë nevojë imediate që kriza të marrë fund dhe të punohet nga të gjithë për një Shqipëri më të mirë pas kaq shumë vitesh trazicion kaotik.
Ndoshta ky lajm mund dhe duhet të shërbejë si një apel domethënës për të gjitha palët politike në Shqipëri. /noa.al/
