“Nesër opozita dhe aleatët tanë janë në sheshin e protestës përsëri. Ne u bëjmë thirrje që protesta të jetë sa më paqësore dhe me mesazhet e duhura që e rikthejnë opozitën e djathtë në drejtimin dhe përputhjen e domosdoshme me SHBA, BE dhe Gjermaninë,”- ka deklaruar sot, prof. Arian Galdini, drejtuesi i partisë Liri, Demokraci dhe Etikë.
Ligjëratën Galdini e ka shpërfaqur gjatë një takimi me grupet që po punojnë nëpër bashkitë e vendit për proçesin e mbledhjes së firmave mbështetëse, si edhe përzgjedhjen e listave të kandidatëve të LDE në këshillat bashkiakë.
Pasi ka përmendur se opozitës, opozitarizmit dhe Shqipërisë nuk i vjen asnjë e mirë nga mosdëgjimi dhe mospërputhshmëria me Perëndimin, Galdini ka argumentuar se “…Properëndimorizmin ne si të djathtë e kemi detyrim ndaj brezave që kanë qenë, janë e do të jenë në këtë vend”.
“Ne si LDE, si parti e djathtë opozitare dhe si anëtare e koalicionit opozitar të drejtuar nga PD i bëjmë thirrje Lulzim Bashës dhe drejtuesve të Partisë Demokratike, por edhe aleatëve tanë të tjerë të djathtë e të qendrës së djathtë që të marrin një vendim historik dhe madhor dhe të hyjnë në zgjedhjet lokale të 30 Qershorit,”- ka vijuar të thotë kryrtari i LDE-së.
Duke argumentuar se hyrja së bashku në zgjedhje, do të thotë rikthim si opozitë në rrugën institucionale, rikthim në udhën e duhur properëndimore.
” Pa perëndimin ne nuk fitojmë dot asnjë betejë, por edhe nëse fitojmë, është padiskutim fitore e gabuar, në rrugën e gabuar për qëllimet e gabuara”,- ka qenë artikulimi i mëtejshëm i Arian Galdinit, që ka ripërsëritur sërish qendrimin unanim të forumit drejtues të LDE-së, lidhur me pjesëmarrjen e kësaj partie në zgjedhjet e pritëshme të 30 Qershorit.
“Nëse aleatët tanë opozitarë nuk vijnë në zgjedhje, ne si LDE do të shkojmë edhe si partia e vetme e djathtë dhe opozitare. Këta së bashku PD – PS kanë bërë një Kod elektoral kriminal, antiliri dhe antidemokraci. Sipas këtij Kodi, që ne si LDE e çdo lëvizje e re politike të marrë pjesë në zgjedhje, nevojiten afërsisht për të 61 bashkitë, gati 30 mijë firma. E çdo firmëtar duhet të japë edhe fotokopjen e kartës së identitetit. E të gjitha këto duhen noterizuar. Pra është një mision gati i pamundur. Kodi Elektoral kriminal PD – PS, kërkon që një parti e re apo një lëvizje e re politike të organizohet në mënyrë militare ose të shitet tek oligarkët apo tek të korruptuarit e botës së krimit për të siguruar mundësinë e konkurimit..”,- ka kumtuar kryesuesi i partisë së djathtë, aleate me PD-në e Lulzim Bashës./CNA
