Opozita ka paralajmëruar se nuk do të lejojë zhvillimin e datës së zgjedhjeve vendore as më 30 qershor, as në një datë tjetër, sa kohë që Edi Rama do të jetë kryeministër i Shqipërisë.
Për më tepër që, dhe në 10 pikat e fiksuara në marrëveshjen e koalicionit mes partive të opozitës që kanë nënshkruar dhe do të nënshkruajnë, është nënvizuar qartë në pikën 5 ku thuhet: “Pamundësimi i zgjedhjeve farse të diktuara nga pakti i Ramës me krimin”.
Madje Berisha, Paloka dhe eksponentë të tjerë të PD kanë qënë më radikalë në paralajmërimet e tyre se, nëse Rama tenton të zhvillojë zgjedhjet pa opozitën do të ketë bllokim të qendrave të votimit, përplasje civile dhe luftë.
Në këto kushte, është ushtria ajo që merr në dorë ruajtjen e institucioneve me rëndësi të veçantë.
Sa herë ka pasur zgjedhje parlamentare por dhe vendore, gjithnjë institucionet më të rëndësishme të shtetit shqiptar, përfshirë dhe godinën e KQZ, janë ruajtur nga ushtria.
E për ilustrim, përballja me turmat që kanë sulmuar institucionin zgjedhor ka qënë evidente në zgjedhjet e korrikut të vitit 1997, kur ndonëse nuk kishte gjendje të jashtëzakonshme, ka qënë ushtria ajo që e mbrojti godinën e KQZ në sulmin e armatosur të përkrahësve të Monarkisë.
Në këto kushte, duke qënë se dhe institucioni zgjedhor është i një rëndësie të veçantë, pasi në qendrat e votimit, në qendrat e numërimit të votave dhe në KQZ te Pallati i Kongreseve, gjendet rezultati i qeverisjes vendore, ruajtja do të merret në dorë nga ushtria.
Pritet që efektivët e FA do të jenë në mbështetje të policisë jashtë perimetrit të qendrave të votimit, të numërimit dhe të KQZ, të cilat do të jenë të instaluara sipas vendimit të institucionit më të lartë zgjedhor vetëm në ambiente publike, për të ndaluar çdo akt violent ndaj zgjedhjeve.
Ndërhyrja e tyre për të evituar përplasjet dhe aktet e dhunshme ndaj kutive të votimit, zgjedhësve dhe komisionerëve do të bëhet sipas Kodit Zgjedhor, vetëm me kërkesën e shumicës së anëtarëve të komisioneve vendore zgjedhore dhe qendrave të numërimit të votave.
Në këtë mënyrë mund të parandalohet çdo akti i dhunshëm, që mund të pengojë ecurinë normale të zhvillimit të votimit, numërimit të votave dhe nxjerrjes së rezultatit./Pamfleti
