Lëvizja Socialiste për Integrim dhe Partia Demokratike sot janë në aleancë të ngushtë. Edhe bashkëshorti i Monikës, që është akoma në zyrën e Presidentit, ka dalë hapur në krah të partisë së tij duke shkelur Kushtëtutën.
Nga ana tjetër, duke përdorur disa përgjime ku socialistët komunikojnë me njëri tjetrin dhe duke i botuar në një tabloid gjerman, PD dhe LSI po përpiqen t’a shesin veten si ‘virgjëresha’ kur vjen puna te shit-blerja e votës. E këtë nuk e themi ne, por e kanë thënë vetë ata gjatë qershorit të 2015.
Ku historia flet ndryshe dhe videot nuk të lë të gënjesh, madje dëshmojnë të kundërtën nga sa na hiqen PD dhe LSI.
Po të kthehemi pas në kohë, në zgjedhjet lokale të para katër viteve (për të mos përmendur 2017 ku Basha për LSI nuk linte gjë pa thënë si për blerje votash e për korrupsion), kupton se PD-LSI që sot janë bashkë në opozitë e bëjnë moral për votat, janë në fakt deri në fyt të zhytur në këtë histori.
Më poshtë po ju sjellim kryetitujt, deklaratat dhe kundër deklaratat e PD-LSI për shitblerjen e votës, ku sulmonin njëra tjetrën hapur për raste konkrete.
LUAN RAMA: “Dua që të shpreh dhimbjen e madhe për gjendjen e dëshpëruar e të pashpresë në të cilën gjendet kuzhina e mykur dhe kryekuzhinieri i dështuar i SHQUP-it, të cilët, të përfshirë prej panikut të humbjes së radhës në zgjedhjet e 21 qershorit, kanë sajuar alibinë e shpifjes për gjoja blerje të votuesve!
Makina e vjetër propagandistike e stilit stalinist të SHQUP-it, në përpjekje për t’i paraprirë humbjes që do të vijë prej ndëshkimit qytetar, është kaq e çekuilibruar dhe e çoroditur, saqë fyen e poshtëron votuesit dhe mbështetësit e vet, të cilët i konsideron si mall që shiten e blihen, duke dëshmuar në këtë mënyrë, krizën e thellë e të pashërueshme të besimit ndaj SHQUP-it, si kuzhinë e shpifjeve dhe e trillimeve bajate.
Kryekuzhinieri dështak të mos ngatërrojë zgjedhjet e lira, të ndershme e korrekte të 21 qershorit, me fushatën e blerjeve që e emëruan atë kryekuzhinier të SHQUP-it. Ndaj në gjendjen e mjeruar në të cilën ndodhet, s’më mbetet tjetër veç t’i kujtoj vargjet e këngës popullore: “O Lulo të hëngërt tënja, se e ke të keqen brenda!”.
