Një ditë para protestës së opozitës Ambasada Amerikane nxit qytetarët dhe institucionet në Shqipëri që të mbështesin parimet e sundimit të ligjit. Ajo i quan sulmet në shkolla të pakuptimta dhe kërkon sundim të ligjit që mbron integritetin dhe sigurinë e procesit zgjedhor.
Ambasada i bën thirrje drejtuesve të opozitës që të mbajnë përgjegjësi për zhvillimin e protestës së nesërme dhe t’i bëjnë thirrje publikisht mbështetësve të tyre të mblidhen paqësisht.
“Shtetet e Bashkuara duan atë që meriton populli shqiptar: sundim të ligjit që mbron punonjësit civilë dhe shkollat nga sulmet e pakuptimta, që mbron integritetin dhe sigurinë e procesit zgjedhor, dhe që mban premtimin e së drejtës së qytetarit për të protestuar paqësisht ndërkohë që bën që ata që përfshihen në dhunë të mbajnë përgjegjësi. Nxisim të gjithë qytetarët dhe të gjitha institucionet kudo në Shqipëri që të mbështesin parimet e sundimit të ligjit, të refuzojnë dhunën në të gjitha format e saj, si dhe të ushtrojnë paqësisht të drejtat e tyre demokratike ndërkohë që lejojnë bashkëqytetarët e tyre të bëjnë të njëjtën gjë. Po ashtu, iu bëjmë thirrje organizatorëve të protestës së nesërme që të mbajnë përgjegjësi përballë po të njëjtave parime, t’iu bëjnë thirrje publikisht mbështetësve të tyre të mblidhen paqësisht si dhe të refuzojnë energjikisht dhunën në çdo mundësi”, thuhet në njoftimin e ambasadës.
Një ditë më parë edhe OSBE dënoi sulmet e ndodhura në disa KZAZ në vend, të cilat përgjatë dy ditëve të fundit kanë shënuar një numër incidentesh duke tentuar të pengojnë procesin zgjedhor. Ajo iu drejtua jo vetëm autorëve por edhe nxitësve të tyre të mbajnë përgjegjësi ligjore.
m.v.
