Ideja e Hashim Thaçit për të ndryshuar kufijtë me Serbinë duket se ka alarmuar një numër të madh politikanësh në vendin tonë. Deri më tani Sali Berisha, disa deputetë pranë tij dhe Petrit Vasili nga LSI janë deklaruar hapur kundër një lëvizje të tillë. Të vetmit që nuk kanë reaguar publikisht janë kryeministri Edi Rama, kreu i opozitës Lulzim Basha dhe presidenti Ilir Meta.
Teksa për dy të parët nuk dihet ende se çfarë mendojnë, për Metën janë dhënë deri më tani sinjale të qartë se ai është kundër ndryshimit të kufijve. Menjëherë pasi Thaçi deklaroi se ka ardhur koha për të korrigjuar vijën kufitare, Meta nisi një vizitë në Kosovë. Që prej datës 5 gusht ai ndodhet atje dhe përmes rrjeteve sociale ka treguar se po promovon turizmin.
Por gazeta ka mësuar të tjera detaje nga vizita e tij. Meta ndodhet në Kosovë bashkë me kryetaren e LSI Monika Kryemadhi dhe shoqërohet nga disa gazetarë dhe këshilltarë të tij, të cilët janë shfaqur hapur kundër ndryshimit të kufijve, duke treguar në një farë mënyre se këtë mendim ka dhe Meta. Por dje Meta dha sinjal të qartë se është krah Berishës dhe partisë së tij për këtë çështje. Meta ishte dje në komunën e Shterpçës dhe jo pa qëllim.
Aty ka komunitet serb dhe Meta në rrjete sociale deklaroi se deri më tani ka pasur një bashkëjetesë shumë të mirë mes shqiptarëve dhe serbëve në Kosovë. Kjo deklaratë e Metës bëri jehonë në mediat pranë LSI e PD, ku duket se ishte një mesazh për Thaçin dhe përfaqësues të tjerë, të cilët kërkojnë që Serbia të marr territoret ku ka serbë dhe Kosova ku ka shqiptarë.
“Kënaqësi të vizitoja fermat ku kultivohen mjedrat më të mira në botë, në komunën e Shterpcës (Brezovicë) dhe një investim bashkëkohor të përpunimit dhe ruajtjes së frutave të pyllit. Vizioni i Bratislavit, Kryetarit të komunës mbështetur tek shpirti punëtor i këtij komuniteti të shkëlqyer ka sjellë ndryshime tepër shpresëdhënëse, duke hapur vende të reja pune dhe të ardhura më të mira për banorët dhe komunën.
Shterpca është një komunë model, ku bashkëjetesa midis serbëve e shqiptarëve është e admirueshme dhe solide”, tha Meta. Deklarata e tij ishte një sinjal i qartë se Meta është kundër rishikimit të kufijve.
